ئه‌رێ راسته‌ پیرۆزیێن وه‌لاتى كه‌فتینه‌ بن مه‌ترسیێ دا

ئه‌رێ راسته‌ پیرۆزیێن وه‌لاتى كه‌فتینه‌ بن مه‌ترسیێ دا
سه‌رنڤیسكار
د دیرۆكێ دا هاتیه‌ دیاركرن ، كو گه‌له‌ك گه‌ل و ملله‌تان زولم و زوردارى و ئه‌شكه‌نجه‌دان و تاكو گه‌هشتیه‌ قوناغێن ئه‌نفال و جینوسایدێ لێ هاتینه‌كرن.
دناڤ ڤان گوتن و چوار چوڤه‌یى دا ملله‌تێ كورد خه‌لكێ كوردستانێ پشكا شێرى به‌ركه‌فتى یه‌.
هه‌ر دگه‌ل دوو پارچ بوونا كوردستانێ ل شه‌رێ چالدێران و پاشان كوردستان ل شه‌رێ جیهانیێ ئێكێ دبیته‌ چوار پارچه‌ و ب سه‌ر عیراق و سوریا و ئیران و توركیادا دهێته‌ دابه‌شكرن ب رێكه‌فتنا سایكس و بیكوى .
ئه‌گه‌ر بتنێ وه‌كو نموونه‌ ئه‌م عیراقێ وه‌ربگرین . گه‌لێ كورد و خه‌لكێ كوردستانێ تووشى ب هزاره‌ها توندوتیژیێ بوویه‌ و تووشى كیمیا بارانكرن و گوند خرابكرن و ئه‌نفال و جینوسایدێ بوویه‌.
ئه‌ڤه‌ قه‌ده‌را مه‌ كوردانه‌ و ئه‌م د رازیبووینه‌ و ئه‌م د رازینه‌ و دێ رازى ژى بین لێ ئه‌وا من دڤێت ببێژم بۆ چى ژ ئه‌نجامێ زێده‌تر (25)سالێن حوكمرانیێ هێشتا ئه‌م نه‌شیاینه‌ وان هه‌موو تاوان و كاره‌ساتان و جینوسایدان نه‌ بتنێ بكه‌ینه‌ پرسه‌كا نێڤ ده‌وله‌تى و جیهانى به‌لكو ئه‌م دناڤ خویا كوردستانێ ژى ب دروستى نه‌بووینه‌ فلمێن سینه‌مایى و نه‌بووینه‌ كلیپێن سترانبێژان و نه‌بووینه‌ هوزانێن هوزانڤانان و نه‌بووینه‌ بابه‌تێن كور و سمیناران و نه‌بووینه‌ نڤیسینێن بناڤ نڤیسكار و ره‌وشه‌نبیران و یا ژ هه‌موویان ژى گرنگتر ب دروستى و ب كارتێكرن نه‌بووینه‌ پروگرامێن خواندنێ كو ل هه‌موو قوناغێن خواندنێ بهێنه‌ گووتن .
دیسان خێزان و ده‌یك و باب نه‌شیاینه‌ ئه‌زموونا خویا ژیانێ بۆ زارۆك و كچ و كورێن خو به‌حس بكه‌ن داكو ئه‌وژى ب نیشتیمان په‌روه‌رى و هزرا نه‌ته‌وه‌یى بهێنه‌ ئاڤاكرن داكو به‌رى هه‌ر تشته‌كێ حه‌ز ژ پیروزیێن وه‌لاتێ خو بكه‌ن مینا (ئاخ- ئالا – زمان – شه‌هید – پێشمه‌رگه‌ – كه‌لتور) چونكه‌ ئه‌ڤ چه‌نده‌ دێ مه‌ هه‌موویان پێگڤه‌ به‌ره‌ڤ سه‌ركه‌فتن و شاره‌زایى و زیره‌كیێ و دلوڤانیێ و به‌خته‌وه‌ریێ به‌تن.
له‌ورا دڤێت هه‌موو لایه‌نێن په‌یوه‌ندیدار به‌رسڤا وان هه‌موو پرسیار و دیدو بۆ چوونا و ناڤه‌رۆكێ بده‌ن.
-دگه‌ل رێزگرتنێ-