به‌ر ب سه‌ربه‌خوه‌یێ

• پشكا حه‌فتێ:
پۆلینكرنا ده‌ستهه‌لاتان ده‌ستنیشانكرنا ئه‌رك و رۆلێ هه‌ر ده‌ستهه‌لاته‌كێ ژ بۆى خزمه‌تكرنا به‌رژه‌وه‌ندیا گشتى نه‌كاره‌كێ هندێ ب ساناهى یه‌ ، لێ ئه‌گه‌ر ب پلان و به‌رنامه‌ هه‌ر ده‌ستهه‌لاته‌ك ل دووڤ پێدڤى و داخوازیێن خه‌لكى به‌رنامێ خوه‌ دارێژیت، هه‌لبه‌ت دێ پێگڤه‌ گرێدانه‌ك د ناڤبه‌را وێ ده‌ستهه‌لاتێ و خه‌لكى دا دروست بیت، به‌لێ ب مخابنى ڤه‌ د ڤى چارچووڤه‌ى دا هزر وه‌كو پێدڤى ل سه‌ر نه‌ هاتیه‌كرن ژبه‌ر هندێ باراپترى ده‌ستهه‌لاتان وه‌كى خوه‌ بخو كار دكه‌ن، له‌ورا هه‌رده‌م دووراتیه‌ك د ناڤبه‌را وان و خه‌لكى دا هه‌یه‌ ده‌مێ دووراتى هه‌بیت كێماسى په‌یدا دبن ده‌مێ كار ل سه‌ر كێماسیان نه‌هێته‌كرن دبنه‌ ئاریشه‌ ده‌مێ ئاریشه‌ نه‌هاته‌ كونترۆلكرن چ سنۆر نامینن و هه‌ر ئێك وه‌كى خوه‌ ره‌فتارێ دكه‌ن دوى ده‌مى دا هه‌مى ده‌ستهه‌لات هه‌مى خه‌لك پێگڤه‌ زه‌ره‌رمه‌نده‌ مه‌ دڤێت به‌حسێ رێزبه‌ندیا ده‌ستهه‌لاتان بۆ هه‌وه‌ دیار بكه‌ین.
1ـ ده‌ستهه‌لاتا یاسا دانانێ.
2ـ ده‌ستهه‌لاتا جێ به‌جێكرنێ.
3ـ ده‌ستهه‌لاتا دادوه‌ریێ.
4ـ ده‌ستهه‌لاتا راگه‌هاندنێ.
5ـ ده‌سهه‌لاتا رێكخراو و كۆمه‌لێن مه‌ده‌نى.
نوكه‌ مه‌ دڤێت ل سه‌ر سێ ده‌ستهه‌لاتان پاسێ بده‌ین و ده‌رباز ببین و به‌حسێ ده‌ستهه‌لاتا چارێ بكه‌ین ده‌ستهه‌لاتا چارێ ژى دهێته‌ دابه‌شكرن و پۆلینكرن ل سه‌ر ئه‌ڤێن ل خوارێ.
1ـ روژنامه‌ و گوڤار واته‌ خواندن.
2ـ تله‌ڤزیون واته‌ دیتن.
3ـ رادیۆ واته‌ بیستن.
4ـ سوشیال میدیا واته‌ تورێن جڤاكى.
هه‌كه‌ بهێت هه‌ر ئێك ژ ڤانه‌ ئه‌م ل سه‌ر براوه‌ستین ره‌نگه‌ هه‌ر ئێكى پێدڤى ب چه‌ند گۆشه‌ و گۆتاران هه‌بیت داكو بشێن خالێن ب هێز و لاواز د ناڤ هه‌ر ئێك ژڤانه‌ ده‌ستنیشان بكه‌ین خالێن ب هێز په‌رجان بكه‌ین خالێن لاواز ل چاره‌سه‌ریان بگه‌رین، چونكو ده‌ستهه‌لاتا چارێ كاریگه‌رى و كارتێكرنه‌كا ئێكجار مه‌زن ل سه‌ر هزر و هه‌ست و ره‌فتارێن هه‌ر تاكه‌كه‌سه‌كى هه‌یه‌، ژ به‌ر هندێ ژى دڤێت هه‌مى ده‌مه‌كى گه‌له‌ك ب باشى بزانن.
دێ چاوا ئه‌و مادێن ل به‌ر ده‌ستێ وان ئاراسته‌ى رایا گشتى كه‌ین؟
وه‌ دێ چاوا هزر د وێ چه‌ندێ دا كه‌ن كو بابه‌ت و پرسێن نه‌ته‌وه‌یى و نشتیمانى ژێكجودا كه‌ن؟
وه‌ دێ چاوا به‌رژه‌وه‌ندیا گشتى ل به‌رچاڤ گرن نه‌خاسمه‌ د بابه‌ته‌كێ مینا ریفراندۆم به‌ر ب سه‌ربه‌خوه‌یا كوردستانێ؟
نوكه‌ ئه‌ز وه‌كو عه‌بدولعه‌زیز دێ ڤان پرسیاران ئاراسته‌ى كاك رێنجبه‌رى كه‌م بۆ هندێ هێشتا بابه‌ت ب هزر و بۆچوونێن جودا جودا بهێته‌ زه‌نگینكرن و شرۆڤه‌كرن داكو خوانده‌ڤان ژى بابه‌تى زێده‌تر ل سه‌ر هزره‌كێ بخوینیت و وه‌ربگریت.
پ 1/كاك رێنجبه‌ر تو وه‌كو مامۆستایه‌كێ زانكۆیێ شاره‌زا د وارێن یاسایى دا تو رۆلێ ده‌ستهه‌لاتا چارێ چاوا دبینى؟
رێنجبه‌ر: هه‌لبه‌ته‌ هه‌ر ده‌ستهه‌لاته‌كێ رۆل و ئه‌ركێ خوه‌ هه‌یه‌ ده‌ستهه‌لاتا چارێ ژى كو ل سه‌ر میدیایێ ب گشتى هاتیه‌ په‌سه‌ندكرن دڤێت ئه‌ڤ ده‌ستهه‌لاته‌ هه‌مى ده‌مه‌كى د خزمه‌تا به‌رژه‌وه‌ندیا گشتى دا بیت و هه‌ول بده‌ت ببیته‌ پره‌كا راستگۆیى و وێره‌كیێ د ناڤبه‌را خه‌لكى و ده‌ستهه‌لاتێ دا، چونكو ده‌ستهه‌لاتا چارێ دشێت راسته‌وخوه‌ و نه‌راسته‌وخوه‌ بچیته‌ د ناڤ هه‌ر ماله‌كێ دا و كاریگه‌ریێ و كارتێكرنێ ل مه‌ژیێ هه‌ر تاكه‌كه‌سه‌كى بكه‌تن، ژ به‌ر هندێ دڤێت هه‌ر روودانه‌ك و پێشهاته‌كێ ب درۆستى هه‌لسه‌نگینیت و یا پێدڤى و پێدڤیتر د به‌رژه‌وه‌ندیا گشتى دا بۆ بكه‌ت، نه‌خاسمه‌ هه‌كه‌ پرسه‌كا نشتیمانى هاته‌ پێش نموونه‌ بۆ ڤێ چه‌ندێ میدیا دڤێت بۆ پرسا ریفراندۆم به‌ر ب سه‌ربه‌خوه‌یا كوردستانێ د وى ئاستێ به‌رپرسیاره‌تیێ دا بیت و ئه‌ڤێ پرسا نشتیمانى ب راستگۆیى یا نه‌ و شه‌فافانه‌ ڤه‌گوهێزیت.
پ 2/كاك رێنجبه‌ر چ ئه‌رك دكه‌ڤیته‌ سه‌ر ملێن ده‌ستهه‌لاتا چارێ كو میدیایه‌ بۆ هندێ گرنگیا پرسا ریفراندۆمێ بۆ خه‌لكى شرۆڤه‌ بكه‌ت؟
رێنجبه‌ر: كاك عه‌بدولعه‌زیز د رستا پرسیارێ دا تو دبێژى (گرنگیا) پرسا ریفراند‌ومێ واته‌ ئه‌ڤ پرسه‌ پرسه‌كا گه‌له‌ك گرنگه‌ ، له‌ورا ژى دڤێت میدیا دچارچووڤێ گرنگیا ڤێ پرۆسێ دا گه‌له‌ك ب گرنگى ئه‌ڤێ پرسێ بۆ هه‌مى ته‌خ و چینان شرۆڤه‌ بكه‌ن و د رێیا خه‌لكێ شاره‌زا و بسپۆرێن تایبه‌تمه‌ندێن جودا جودا ئه‌ڤێ پرسێ د رێیا ریپۆرتاژ و مێزگه‌ردێن خوه‌دا بۆ خه‌لكى ئه‌وا پێدڤى بكه‌ت وى ده‌مى دێ ب دروستى ژى ئه‌رك و رۆلێ میدیایێ دیار بیت و به‌رچاڤ بیت وه‌ خه‌لك دێ خوه‌ د ناڤ میدیایێ دا بینن پاشى دێ پێگڤه‌ گرێدانه‌ك د ناڤبه‌را خه‌لكى و ده‌ستهه‌لاتێ دا دروست بیت ئه‌گه‌رێ سه‌ره‌كى ده‌ستهه‌لاتا چارێ و میدیایه‌.
دووماهی ئه‌م پێگڤه‌ گه‌هشتینه‌ وى ئه‌نجامى كانێ گرنگیا ده‌ستهه‌لاتا چارێ چى یه‌ و هه‌كه‌ بڤێت دشێت چ رۆل بگێریت و ئه‌و رۆلێ دگێریت دێ چاوا كارتێكرنێ ل بارا پترى تاك و جڤاكى كه‌ت واته‌ ده‌ستهه‌لاتا چارێ ب هه‌مى رێك و میكانزمێن خوه‌ڤه‌ دشێت كاریگه‌ریه‌كا ئێكجار مه‌زن هه‌بیت نه‌خا سمه‌ د پرۆسه‌یه‌كا مینا ریفراندۆم به‌ر ب سه‌ربه‌خوه‌یا كوردستانى،َ چونكو دڤێت هه‌مى لایه‌ك ژ قووناغا ئاخفتن و تیۆرى ده‌رباز ببن بۆ قووناغا كریار و پراكتیكى و بۆ ڤێ چه‌ندێ میدیا دشێت كار ئه‌كته‌ره‌ك گه‌له‌ك كاریگه‌ر بیت دڤێ پرۆسا نشتیمانى دا داكو ئه‌و ژى بشێت بچیته‌ د ده‌رگه‌هێ سه‌رفه‌رازیێ دا نوكه‌ ب تنێ یا ماى ببێژین به‌لێ هزار جاران به‌لێ بۆ ریفراندۆم به‌ر ب سه‌ربه‌خوه‌یا كوردستانێ.

پشكا هه‌شتێ/ رۆلێ ره‌ڤه‌ندێ
مه‌ د خه‌له‌كێن چوویى دا به‌حسێ رۆلێ گه‌له‌ك لایه‌ن و ته‌خوچینان د ناڤ كوردستانێ دا كریه‌، لێ ئه‌ڤرۆكه‌ مه‌ دڤێت به‌حسێ رۆلێ ره‌ڤه‌ندا كوردستانى ل ده‌رڤه‌ى كوردستانێ دا بكه‌ین واته‌ دروستكرنا لۆبیێن ب هێز بۆ پشته‌ڤانیا ریفراندۆما سه‌ربه‌خوه‌یا كوردستانێ دا ژ به‌ر وان كاودانێن جودا جودا ئه‌وێن ب سه‌رێ خه‌لكێ كوردستانێ هاتین د قووناغێن جودا جودا دا هه‌مى ئه‌و لایه‌نێن سیاسى ل هه‌رێما كوردستانێ هه‌مى ئه‌و پێكهاتێن نه‌ته‌وه‌یى ل هه‌رێما كوردستانێ هه‌مى ئه‌و پێكهاتێن ئاینى ل هه‌رێما كوردستانێ هه‌مى تایبه‌تمه‌ندیێن جودا جودا ل هه‌رێما كوردستانێ قه‌ستا ده‌رڤه‌ى وه‌لاتى كرینه‌ ب سه‌ر بارا پترى وه‌لاتێن جیهانێ هاتینه‌ به‌لاڤكرن ئه‌ڤ خه‌لكى فێرى كه‌لتوور و یاسا زمانێن ده‌وله‌تێن دونیایێ بووینه‌،به‌لێ ل وێ باوه‌رێ دانه‌ كو هه‌موو وه‌خته‌كى عه‌شقا كوردستانێ ئاخا كوردستانێ ناڤێ كوردستانێ ئالایێن كوردستانێ شه‌هیدێن كوردستانێ كاره‌سات و تاوانێن ب سه‌رێ كوردستانێ هاتین ناڤێن پێشمه‌رگێن كوردستانێ ده‌ستكه‌فتێن حوكمه‌تا هه‌رێما كوردستانێ هه‌مى ده‌مه‌كێ بووینه‌ ڤۆلكانه‌كا مه‌زن د دلێ وان دا گازیا ده‌وله‌تبوونێ دكه‌ن و ئه‌ڤى خه‌لكى شیاینه‌ تێكه‌لیه‌كا گه‌له‌كا باش ل گه‌ل خه‌لكێ وان ده‌وله‌تان بكه‌ن ئه‌وێن لێ ئاكنجى ژبه‌ر هندێ ئه‌ڤ ده‌مه‌ ده‌م ده‌مێ وانه‌ رۆژ رۆژا وانه‌ كو هه‌ول بده‌ن په‌یاما خه‌لكێ كوردستانێ بگه‌هینه‌ جهێن بریار دانێ وه‌ بشێن داخوازیێن گه‌لێ كوردستانێ ب هه‌مى پێكهاتێن وێڤه‌ بگه‌هینه‌ رایا گشتى یا جیهانێ وه‌ ب جل و به‌رگێن كوردى وه‌ ب جل و به‌رگێن كوردستانى ب ئالایێن كوردستانێ ب زمانێن كوردستانێ جودا جودا ل سه‌ر جاده‌ و ل جهێن فه‌رمى ئه‌نجام بده‌ن وه‌ داخوازیا خه‌لكێ كوردستانێ بگه‌هینه‌ ناڤه‌ندێن بریار دانا جیهانى وه‌ بشێن رۆله‌كێ گه‌له‌كێ مه‌زن بگێرن بۆ پشته‌ڤانیكرنێ ل ریفراندۆما سه‌ربخوه‌یا كوردستانێ، چونكو ره‌ڤه‌ندا كوردستانى نوكه‌ شیاینه‌ تێگه‌هشتنا راستا هه‌مى وا ده‌وله‌تا بزانن ئه‌وێن لێ دژین ژبه‌ر هندێ پشته‌ڤانیا وان ده‌وله‌تا ب ده‌ستڤه‌ئینانا وان ده‌وله‌تان پشتگیریكرنا ناڤه‌ندێن بریارێ یێن وان ده‌وله‌تان بۆ ریفراندۆما سه‌ربخوه‌یا كوردستانێ گه‌له‌ك گرنگه‌ من دڤێت بێژمه‌ هه‌مى ره‌ڤه‌ندا كوردستانێ وه‌ بیرا وان ل گۆتنه‌كا مه‌زنان بینمه‌ڤه‌ ده‌مێ دبێژیت (شام شه‌كره‌ به‌لێ وه‌لات شرینتره‌)راسته‌ نها ئه‌و وه‌لاتێ هه‌وه‌ ل وێ شه‌كرێ گه‌له‌ك شرینتره‌ ژبه‌ر هندێ دڤێت ئه‌ڤرۆكه‌ مه‌زنترین رۆل بهێته‌ گێران بو پشته‌ڤانیا ریفراندۆما سه‌ربخوه‌یا كوردستانێ نوكه‌ ئه‌ز وه‌كو عه‌بدولعه‌زیز دێ ڤان پرسیارێن ل خوارێ ئاراسته‌ى رێنجبه‌رى كه‌م:
پ 1/رێنجبه‌ر ته‌ دڤێت چ بێژیه‌ ره‌ڤه‌ندا كوردستانى ل ده‌رڤه‌ى وه‌لاتى بو پشته‌ڤانیكرنێ ل ریفراندۆما سه‌ربخوه‌یا كوردستانێ؟
رێنجبه‌ر: هه‌لبه‌ت رۆلێ هه‌ر تاكه‌ كه‌سه‌كێ دپرسێن نشتیمانى و نه‌ته‌وه‌یى دا رۆله‌كێ گرنگه‌ نه‌خا سمه‌ ره‌ڤه‌ندا كوردستانى ل ده‌رڤه‌ى وه‌لاتى چونكو گه‌له‌ك جاران شێوازێ هزركرنا وان جوداهى هه‌یه‌ ل گه‌ل هزركرنا تاكێن كوردستانى لێ ده‌مێ كار دهێته‌ سه‌ر هندێ كو وه‌لاتێ وان یێ ل به‌ر گوهۆرینێن مه‌زن، ئه‌و ژى رۆلێ خوه‌ دگێرن لێ ب حوكمێ رێسا و یاسایێن هه‌ر وه‌لاته‌كێ دڤێت كار ل سه‌ر هندێ بهێته‌كرن كو ب ره‌نگه‌كێ مه‌ده‌نى شارستانى ئاشتیخوازانه‌ بشێن پشته‌ڤانیێ بۆ ریفراندۆما سه‌ربه‌خویا كوردستانێ ب ده‌لیڤه‌ ببینن و هه‌ول بده‌ن ل دووڤ یاسا به‌لگه‌نامه‌یێن نێڤده‌وله‌تى بیرا هه‌مى په‌رله‌مان و حوكمه‌ت و جهێن بریار دانێ ل هه‌ر وه‌لاته‌كى بینه‌ڤه‌ كو هه‌ر ملله‌ته‌كێ مافێ چاره‌نڤیسى هه‌یه‌ ئه‌ڤه‌ خاله‌كا گه‌له‌ك گرنگه‌ داكو بشێن وێ پشته‌ڤانیێ ب ده‌ستڤه‌بینن.
پ 2/رێنجبه‌ر ژبلى به‌لگه‌نامه‌ یاسایێن نێڤ ده‌وله‌تى چ تشتێ دى یێ گرنگه‌ ره‌ڤه‌ندا كوردستان ل ده‌رڤه‌ى كوردستانێ بیرا جڤاكێ نێڤده‌وله‌تى بینته‌ڤه‌ داكو پشته‌ڤانیا وان بۆ ریفراندۆما سه‌ربخوه‌یا كوردستانێ ب ده‌ستڤه‌ بینن؟
رێنجبه‌ر: ئه‌ڤه‌ پرسیاره‌كا گه‌له‌ك جوانه‌ و دڤێت ره‌ڤه‌ندا كوردستانى هه‌مى رێك و ئالاڤ و میكانزم ئاخفتن و كریارێن جودا جودا نه‌ بتنێ یێن ده‌رڤه‌ى كوردستانێ به‌لكو یێن د ناڤ كوردستانێ ژى دا بیرا جڤاكێن نێڤده‌وله‌تى و ناڤه‌ندێن بریاردانێ بینه‌ڤه‌ كو ب تنێ گه‌لێ كوردستانێ هه‌ر ل شه‌ڕێ جیهانى یێ ئێكێ پاشان شه‌رێ جیهانى یێ دووێ دابه‌شكرنا كوردستانێ ب سه‌ر ده‌وله‌تێن جودا جودا دا نه‌خا سمه‌ ئه‌و تاوان و كاره‌ساتێن ئێك ل دووڤ ئێك ل سه‌ر ده‌ستێن رژێمێن عیراقێ ب تایبه‌ت (35) سالێن حوكمرانیا رژێما سه‌دام و به‌عسیان هه‌مى تاوانێن دژى مرۆڤایه‌تیێ ب سه‌رێ خه‌لكێ كوردستانێ ئیناین پشتى نه‌مانا وێ رژێمێ ژى به‌غدا هه‌ر نه‌شیا مافێن خه‌لكێ كوردستانێ بۆ دابین بكه‌ت واته‌ ل ده‌ستپێكا دروست بوونا عیراقێ عیراق ب زورى هاتیه‌ پێك ئینان و دروست بوویه‌ ب تایبه‌تى پشتى دروستبوونا مه‌زنترین رێكخراوا تیرۆرستیا ب ناڤێ (داعش) كو ناڤوده‌نگیا وێ ل هه‌مى جیهانێ به‌لاڤ بوویه‌ به‌لێ پێشمه‌رگێن كوردستانێ ب هه‌مى پێكهاتێن خوه‌ڤه‌ ئه‌و بتنێ شیان ئه‌ستورا داعش تێك بشكێنن و ل پێش هه‌مى جیهانا ئازاد ب تایبه‌ت ئه‌وێن به‌حسێ مافێ مرۆڤى دكه‌ن شه‌رى بكه‌ن،له‌ورا ئه‌ڤروكه‌ ئه‌و رۆژه‌ كو جڤاكێ نێڤ ده‌وله‌تى ژى پشته‌ڤانیا سه‌ربخوه‌یا هه‌رێما كوردستانێ بكه‌ت وه‌ بۆ ڤێ چه‌ندێ ره‌ڤه‌ندا كوردستانێ دشێن باشترین رۆل بگێرن.
دووماهیك واته‌ ل دووماهیێ ئه‌ز و رێنجبه‌ر گه‌هشتینه‌ ئه‌وێ باوه‌ریێ كو ئه‌گه‌ر ره‌ڤه‌ندا كوردستان بڤێت دێ شێت رۆله‌كێ مه‌زن گێریتن بو پشته‌ڤانى و ب ده‌ستڤه‌ئینانا په‌رله‌مان و حوكمه‌ت ناڤه‌ندێن بریار دانێ ل هه‌موو جیهانێ بۆ ریفراندۆما سه‌ربه‌خویا كوردستانێ جاره‌كا دى دێ بێژینه‌ هه‌مى ره‌ڤه‌ندا كوردستانێ ژبیر نه‌كه‌ن (شام شه‌كره‌ به‌لێ كوردستان گه‌له‌ك شرینتره‌).

• پشكا ده‌هێ:

رۆلێ دوكانداران
یا ڤه‌شارتى نینه‌ كو هه‌ر جار ئه‌م به‌حسێ رۆلێ ته‌خه‌ك و چینه‌كا گرنگا جڤاكى دكه‌ین ل دووڤ تێگه‌هشتنا مه‌ هه‌مى ئه‌وێن ئه‌م به‌حس دكه‌ین دگرنگن، لێ هنده‌ك ل هنده‌كێن دى گرنگترن ئه‌وا ئه‌ڤێ جارێ من دڤێت به‌حسێ رۆلێ وان بكه‌م، ئه‌و ژى(دوكاندارن) رۆلێ دوكانداران وه‌كو ئه‌و ته‌خا گه‌له‌ك گرنگ كو رۆژانه‌ راسته‌وخوه‌ دانوستاندنێ ل گه‌ل خه‌لكى دكه‌ن ئه‌و دشێن رایا گشتى ب هه‌ر ئاراسته‌یه‌كا وان دڤێت ببه‌ن چونكو ب رێیا كارێ خوه‌ دانوستاندنان ل گه‌ل ته‌خێن دى یێن جڤاكى دا رۆژانه‌ ل گه‌ل هزاره‌ها مرۆڤان دكه‌ن ئه‌گه‌ر وانا بڤێت دێ جڤاكى ب ئاراسته‌یه‌كا ئه‌رێنى ڤه‌ به‌ن یان به‌روڤاژى، له‌ورا ل گۆر باوه‌ریا من دوكاندار دشێن رۆله‌كێ ئێكجار مه‌زن د پرۆسه‌یا ریفراندۆما سه‌ربه‌خوه‌یا كوردستانێ دا بگێرن، دوكاندار وه‌كو مرۆڤه‌كێ رێنجبه‌ر دشێت رۆلێ خوه‌ د هه‌مى پرۆسێن ژیانێ دا بگێریت و رێنجبه‌ریا خوه‌ رۆژ ب رۆژێ به‌ر ب پێشڤه‌ ببه‌ت، چونكو دڤێت بزانیت ئه‌گه‌ر نشتیمانێ ئه‌و تێدا دژیت یا ئازاد و یا ئارام بیت، ئه‌و ژى دێ شێت بازاركرنێ ب ره‌نگه‌كێ هێشتا باشتر سه‌ركه‌فتیتر ئه‌نجامده‌ت، نه‌ك هه‌مى هزرا وى ب تنێ ل سه‌ر پاره‌وه‌رگرتن و قازانجكرنێ بیت. كێم كه‌س هندى دوكاندارى رۆژانه‌ خه‌لكى دبینیت، كێم كه‌س هندى دوكاندارى رۆژانه‌ سه‌ره‌ده‌ریێ دكه‌ت، كێم كه‌س هندى دوكاندارى رۆژانه‌ دانوستاندنێ دكه‌ت، به‌لێ هه‌مى ئه‌و بابه‌تێن مه‌ به‌حسكرین پێدڤى ب سه‌ر راوه‌ستیانێ یه‌، ئه‌و ژى كانێ چه‌ند ژ وان گۆتن و كریاران د به‌رژه‌وه‌ندیا گشتى دانه‌، چه‌ند ژ وان گۆتن و كریاران ب تنێ د پاره‌ وه‌رگرتن و به‌رژه‌وه‌ندیا وى دانه‌، یا گرنگه‌ ئه‌م هه‌مى گه‌له‌ك ب باشى بزانین ئه‌گه‌ر كوردستانا مه‌ ئازاد بوو سنۆرێن مه‌ هاتنه‌ ده‌ستنیشانكرن وى ده‌مى هه‌مى دوكاندار دێ باشتر و كاراتر هاورده‌كرنێ و هنارده‌كرنێ كه‌ن وى ده‌مى دێ زه‌نگینتر بن و دێ ناڤێ وه‌لاتێ وان ل سه‌ر متایێ وان هێته‌ نڤیسین، ئه‌ڤ چه‌نده‌ ژ ده‌رڤه‌ى بازاركرنێ و قازانجكرنێ بۆ مرۆڤى ژ لایێ ده‌روونى ڤه‌ ئارامیه‌كا ئێكجار مه‌زنه‌ ژ به‌ر هندێ ژى بۆ پرسه‌كا مینا پرسا ریفراندۆما سه‌رخوه‌یا كوردستانێ دوكاندار دشێت د فرۆتنا هه‌ر متایه‌كێ دا ل گه‌ل هه‌ر كه‌سه‌كێ كارته‌كێ بده‌ته‌ بكرى كو ناڤه‌رۆكا وێ كارتێ هاندانا خه‌لكى بیت داكو پشكداریێ ب به‌لێ د ڤێ پرۆسێ دا بكه‌ن د هه‌مان ده‌م دا د پاره‌ وه‌رگرتنێ دا دوكاندار دشێت پرسا ریفراندۆما سه‌ربخوه‌یا كوردستانێ ل گه‌ل بكڕێ خوه‌، به‌حس بكه‌ت، دیسا دزڤراندنا باقیا پاره‌ى دا دوكاندار دشێت ببێژیت ئه‌ڤه‌ من بهایێ (250) دیناران یان زێده‌تر ل ته‌ زڤراند داكو ژبیرنه‌كه‌ى پشكداریێ د ریفراندۆما سه‌ربخوه‌یا كوردستانێ دا بكه‌ى، د وى ده‌مى دا نه‌ ب تنێ سه‌رۆكێ هه‌رێما كوردستانێ، نه‌ ب تنێ پێشمه‌رگه‌یه‌ك ل سنۆران نه‌ ب تنێ مامۆستایه‌كێ ئاینى ل مزگه‌فتێ یان هه‌ر ئۆله‌كێ دى نه‌ ب تنێ كادره‌كێ لایه‌نێ سیاسى نه‌ ب تنێ میدیا به‌لكو دوكاندار ژى دێ بیته‌ كار ئه‌كته‌ره‌كێ ئێكجار مه‌زن و دێ بیته‌ هه‌ڤپشكێ وان هه‌مى لایه‌نێن مه‌ به‌حسكرین و دێ ب دروستى بیته‌ خودانێ ڤى وه‌لاتى واته‌ ئه‌گه‌ر دوكاندارى بڤێت دێ شێت ببیته‌ پشكه‌كا مه‌زن ل سه‌رئێخستنا پرۆسا ریفراندۆما سه‌ربخوه‌یا كوردستانێ ل هه‌رێما كوردستانێ، لێ هه‌كه‌ نه‌ڤێت یان نه‌كه‌ت وى ده‌مى ئاریشه‌كا مه‌زن په‌یدا دبیت چو ده‌مه‌كێ نه‌شێت ب مرتاحى سه‌رێ خوه‌ دانیته‌ سه‌ر بالیفكا خوه‌ و بنڤیت هه‌ر دێ ئاخینكا هه‌لكێشت د وى ده‌مى دا په‌شێمانى فایده‌ ناكه‌ت، ژ به‌ر هندێ ئه‌ڤرۆ رۆژ رۆژا هه‌مى ته‌خه‌كێ یه‌ نه‌خاسمه‌ ئه‌و ته‌خا گرنگا دبێژنێ دوكاندار، له‌ورا ژى ئه‌و گۆتنا مه‌زنان دهێته‌ بیرا مرۆڤى ده‌مێ دبێژیت (شۆلكه‌رێ خوه‌به‌ خۆشتڤیێ خه‌لكى به‌)، دوكاندار دێ بیته‌ شۆلكه‌رێ خوه‌ خۆشتڤیێ خه‌لكى دێ متایێ خوه‌ ژى فرۆشیت، دێ پارێن خوه‌ ژى وه‌رگریت دێ قازانج ژى كه‌ت، لێ دڤێت هه‌مى پرسێن نشتیمانى و نه‌ته‌وه‌یى ژبیر نه‌كه‌ن داكو بشێت ل سه‌ر بازاركرنا خوه‌ یێ به‌رده‌وام بیت، ئه‌ڤه‌ هنده‌ك ماف و ئه‌ركێن دوكاندارى بوون مه‌ دانه‌ خۆیاكرن، به‌لێ رامان ئه‌و نینه‌ كو ئه‌ڤه‌ ب تنێ نه‌ و ب دووماهی هاتن د پرسه‌كا مینا سه‌ربخوه‌یا كوردستانێ دا، دڤێت ئه‌م هه‌مى خوه‌ ب خودان بزانین ببینه‌ هه‌ڤپشك و پالپشت بۆ سه‌ركه‌فتنا وێ پرۆسێ، چونكو ئه‌گه‌ر مه‌ ئه‌و نه‌كر ئه‌م هه‌مى تێدا دێ خوساره‌ت بین، ده‌مێ خوساره‌ت ژى دبین، د ووڤدا ئه‌م چ بكه‌ین فایده‌ ناكه‌ت، چونكو نوكه‌ ئه‌م وه‌كو هه‌رێما كوردستانێ یێ وه‌كى خوه‌ دئاخڤێن، به‌لێ مه‌ پێدڤى یا ب دروست بوون و راگه‌هاندنا ده‌وله‌تێ هه‌ى ده‌وله‌تێ ژى پێدڤى یا ب مه‌ هه‌میان هه‌ى، له‌ورا هه‌كه‌ ده‌ستێ راستێ هێزا ده‌وله‌تێ بیت ده‌ستێ چه‌پێ هێزا مه‌ بیت واته‌ دێ دو ده‌ست تێكدا بن دێ بیته‌ هێزه‌كا ئێكجار مه‌زن كو چو نه‌حه‌ز و نه‌یار و دوژمنه‌ك نه‌شێت خوه‌ ل به‌ر وێ هێزێ رابگریت، له‌ورا دبێژم گه‌لى دوكاندارێن خۆشتڤى هزرا خوه‌ باش بكه‌ ده‌ستا بهه‌لینه‌ ئه‌ڤ ده‌مێ ل پێشیا ته‌ ده‌مه‌كێ زێرینه‌ و چ جاران د ژیانا ته‌دا دوباره‌ نابیته‌ ڤه‌ ئه‌ز و تو پێكڤه‌ ئه‌م هه‌مى پێكڤه‌ بۆ هشیاریا خه‌لكى بۆ هاندانا خه‌لكى بۆ پشكداریا خه‌لكى داكو هه‌مى خه‌لك پێگڤه‌ بێژن: به‌لێ بۆ ریفراندۆما سه‌ربخوه‌یا كوردستانێ وى ده‌مى ئه‌م هه‌مى پێكڤه‌ دێ چینه‌ د مێژوویا سه‌رفه‌رازیێ دا.