Duhok-DIGC ئنستتیوتا دهوك بۆ ره‌وشه‌نبیریا گشتى
بوچی هەستێ نەتەوایەتی ل دەف گەنجێ مە یێ لاوازە؟
ئەگەر ئەم بەرێ خو بدەینە مێژوویا مللەتێ كورد دێ بینین كو زورداریەكا ئێكجار مەزن ل گەلێ كورد هاتیە كرن ب تایبەت ژلایێ ئەو وەلاتێن كو ژلایێ جوگرافیێ ڤە نێزیكی كوردستانێ و دیروكێ ب قەلەمێ خیانەتێ ل سەر گەلێ كورد نڤیسایە و ئەگەر ئەم بهێینە دیروكا هەڤچەرخ و بتایبەت پشتی سالا (1980) یێ دێ بینین كو مللەتێ كورد د گەلەك قوناغێن نەخوش و ترسناك را دەرباز بویە مینا ئەنفالێن رەش و كیمیا بارانكرنا (حەلەپچە)و كوچ كرنا بابێ روحی یێ مللەتێ كورد (بارزانیێ نەمر), لێ پشتی سەرهلدانا بوهارا سالا (1991)دێ بینین كو قوناغەكا نی یا دەستپێكری هەم ژلایێ سیاسی ڤە و هەم ژلایێ ئابوری و كومەلایەتی ڤە و تاكێ كورد ژیانەكا ئازاد و دویر ژ نەخوشیا دبەتە سەری و پێشكەفتنەكا ئێكجار مەزن ل كوردستانێ یا پەیدا بووی ب تایبەت دبوارێ ئابوری و تەكنولوجیایێ دا و ئەف چەندە ژی دبیتە ئەگەرێ وێ چەندێ كو تاكێ كورد ب تایبەت گەنج دژیانەكا سەقامگیر دا بژیت ,لێ ئەف چەندە نابیتە ئەگەرەك كو هەستا نەتەوایەتی لدەف گەنجێ مە كێم بیت و رەش نفیسیا دیروكێ و قوربانی دانا گەلێ كورد بهێتە ژبیر كرن و پێتڤیە ئەم بزانین ئەف ئازادیا ئەم تێدا چەوا پەیدا بوویە , و ب دیتنا من دڤێت ئەف ووشێن هەنێ(كوردستان, كورد, وەلات, ئاخ, ئالا, بارزانی) بەشەك بن ژ سیستەمێ 
پەروەردەی بو قوناغێن خاندنێ ب تایبەت (سەرەتای, ناڤنجی)دا ببنە پالدەر بو گەنجێ كورد كو بەشەك ژ زمان و دیروكا وەلاتێ خو بزانن چونكی ب مخابنی ڤە ئەم د ژیانا روژانە دا دبینین كو پێتریا گەنجێن مە گرنگیێ نادەنە دیروك و قوربانی دانا مللەتێ كورد و رێبازا باب و باپیرێن خو یێن پێشمەرگە یا ژبیر كری ژبەر هندێ دڤێت هەر كەسەك ژ مە ڤان پرسیارا ل خو بكەتن….
1- ئەرێ بوچی هەستێ نەتەوایەتی ل دەف مە یێ لاوازە ؟
2- ئەرێ بوچی وەكو پێتڤی ئەم حەژ وەلاتێ خو ناكەین ؟
3- ئەرێ بوچی نە گرنگی دان ب وەلاتێ خو لدەف مە پەیدا بویە؟
و یا گرنگە كو هەر كەسەك بزانیت كو هەستا نەتەوایەتی نە بەس ئەو چەندەیە كو تو بچیە بەر سینگێ دوژمنی و چەكی ب هەلگری, لێ تا بجیكترین تشت ژی ب وەلاتێ مروڤی ڤە یێ گرێدای بیت دهێتە هژمارتن هەستێ نەتەوایەتی و راكرنا كاغەزەكێ ل سەر جادێ جوانترین خزمەتە و هەستە بەرامبەر وەلاتێ تە و حەژێكرنا وەلاتی نە گونەهە و نە تاوانە هەروەكی (بارزانیێ نەمر) دبیژیت (ئەگەر حەژێكرنا وەلاتی تاوان بیت ئەز مەزنترین تاوانبارم ل سەر ریێ عەردی), بدیتنا من چەند ئەگەرەك یێن هەین كارتێكرنێ دكەنە سەر گەنجێ كورد و هزرو و بیرێن وی دەربارەی وەلاتێ وی و ئەم دشێین ڤان ئەگەرا د چەند خالەكا دا دیار بكەین:
1- دیر كەتن ژ خاندنا پەرتوكا ب تایبەت ئەو پەرتوكێن بەحسێ مێژوویا مللەتێ كورد دكەن .
2- پیتە نەدانا سیتەمێ پەروەردێ ب هێزكرنا هزروبیرێن نەتەوایەتی ل دەف قوتابیا و دانا بابەتەكی كو ب تمامەتی یێ گرێدای بیت ب مێژوو و دیروكا مللەتێ كورد ڤە
3- خەم ساریا سەنتەرێن رەوشەنبیری و رێكخراوێن جەماوەری و كەم تەرخەمی كرن ب پێشكێشكرنا وورك شوپ و سمینارا لسەر هزرا نەتەوایەتی
4- بەرتەنگیا هزرێن كومەلایەتی و عەشیرەتیێ و كارتێكرنا وان لسەر دەرون و هزرێن گەنجا .
