مامۆستا كەریم بەدەل:
*دڤێت رێزێ ل بیر و بۆچوونێن ئاینێن دی بگرین
*قوتابخانە جهەكێ سەرەكی یە بۆ پەروەردەكرنا مرۆڤان
*دڤێت مامۆستا دشارەزابن د شرۆڤەكرنا وانا ئاینی دا و حەزا وەرگرتنێ ل دەڤ قوتابی پەیدا بكەن
دیدار: ژێگر عەبدولستار
وانا ئاینی ل قوتابخانان گرنگیا خۆ هەیە، بۆ بەلاڤكرنا تێگەهێ پێكڤەژیانێ دناڤ خەلكی دا، بۆ ڤێ جارێ بەرپەرێ لێبوورین و پێكڤەژیانێ ئەڤ دیدارە دگەل مامۆستایێ وانا ئاینی (كەریم بەدەل) كریە.
سنێلە/ دناڤ پەیرەوێ خواندنێ دا چەند گرنگی ب پێكڤەژیانێ دهێتەدان؟
كەریم بەدەل: قوتابخانە جهەكێ سەرەكی یە بۆ پەروەردەكرنا مرۆڤان ژ لایێ مێشكی و دەروونی و مروڤایەتیێ ڤە و هەر وەلاتەكێ ب زانیت ب چ شێواز كەرتێ پەروەردێ برێڤە ببەت، ل دووڤ ئاڤاكرنا كەسایەتیەكا پاقژ و خزمەتكار و دلسۆز بۆ جڤاك و بیر وبۆچوونێن پێشكەفتی، هنگی ئەو وەلات دێ بەرەف ئاستێن بلند چیت، ژبەر ڤێ چەندێ تەكەزیكرنا جوانیا پێكڤەژیانێ ل قوتابخانەیان گرنگیەكا مەزن و سەرەكی یا هەی بۆ پەیداكرنا ڤان بیر و بۆچوونان و چەسپاندنا وان.
سنێلە/ ئەو ماددێ ئاینی یێ دهێتە خواندن چ كارتێكرن ل سەر قوتابیان هەیە؟
كەریم بەدەل: مادێن ئاینی ل ڤێ دوماهیێ هندەك پێزانینێن گرنگ و پڕ بوها بۆ قوتابیان ئینانە پێشچاڤ و چەوانیا بەشەكێ گرنگ ژ ژین و ژیارا ئاینێن دی یێن باش و نە بەرنیاسی بەرچاڤكرن، داكو هەر شاشیەكا پەیدابووی ژ كەڤندا نەمینیت وهزرەكا جوان ژ ئیك و دوو بكەن.
سنێلە/ ئەم چ بكەین باشتر دێ شێین گیانێ پێكڤەژیانێ خۆرت بكەین؟
كریم بەدەل: هەردەم رێزێ ل بیر و بۆچوونێن ئاینێن بەرانبەر بگرین و ل دووڤ هەموو رەوشت و بیر و بۆچوونێن ئاینێ ئیسلامێ و ب تایبەتی دەمێ دبێژین (لكم دینكم ولی دین) و (لااكراە فی الدین) و راستی ژی هەموو ئاینێن خودێ مەزن بۆ مرۆڤان فرێكرین، داخوازا پێكڤەژیانێ و رێزگرتنێ ل ئێك و دوو دكەن.
سنێلە/ گرنگی دانا پەیرەوێ خواندنێ ب ئاینی دێ رەنگڤەدانا وێ یا ئەرێنی چ بیت ل سەر قوتابیان؟
كەریم بەدەل: هەلبەت قوتابی دەمێ دهێتە قوتابخانێ مرۆڤەكێ كوهە پێزانینێن وی دكێمن، ژبەر هندی دڤێت مامۆستا دشارەزابن، كا ب چ رێك ڤان تشتان بو شرۆڤە بكەن و حەزا وەرگرتنێ ل دەڤ پەیدا بكەن.
سنێلە/ د دەمێ شلوڤەكرنا وانێ دا هوین وەك مامۆستا چەوا دشێن سەرەدەریێ دگەل قوتابیێن هەلگرێن ئاینێن جیاواز بكەن؟
كەریم بەدەل: بەری هەموو تشتان رێزی لێ بگرین و بۆ دیار كەین كو ئەم هەموو مرۆڤین جوداهی د ناڤبەرا كەسێ دا نینە، ژبلی كارێ باشی و خراب، ب رێكا زانستی دێ شێین هەموو بابەتێن نە ل بەرچاڤ شرۆڤە كەین و دەمێ مامۆستا پەیڤا ب كار دئینیت دڤێت بزانیت كا دێ چەوا پەیڤێن وەكهەڤ و بێ دل شكاندن هەلبژێریت، دڤێت ل ئاخفتنا خۆ یێ هشیار بیت، داكو هەستا یێ بەرانبەر نە شكێنیت، گەلەكا گرنگە قوتابیێن ئاینێن نە ئیسلام ل وانێن ئاینی ئامادەبن و نەدەركەڤن داكو راستیا ئاینێن دی بزانن و كارتێكرنەكا باش بهێتەكرن ل سەر تێگەهشتنا كەسایەتی.
بێ دەنگی چ جاران نەهاتیە نڤیسین (ئیتالی)
