هەلبەستڤانا سنێلە بەسنە شەمۆ:
دێ هەر یا بەردەوام بم ل سەر نڤیسینا هەلبەستان
من هەلبەست نڤیسینە و كەسی پشتەڤانیا من نەكریە
هەر هەلبەستەكێ ل دۆر گرنگیا بابەتی دنڤیسم
من دڤێت دیوانەكا هەلبەستان چاپ بكەم
دەمێ هەلبەستێ چێدكەم هەست ب خۆشیێ دكەم
دیدار: بەختیار قادر
هەلبەستڤانا چەلەنگ (بەسنە شەمۆ) ل ژێی (13) سالیێ دەست ب نڤیسینا هەلبەستان كریە و تا نهۆ بەردەوامە و هەلبەست ل قوتابخانان و هەلكەفتان گۆتینە و نهۆ قوتابییە و خەلكا كۆمەلگەها شاریایە، هەر وەسا دیاركر كو هەلبەستێن وێ ل دۆر بابەتێن جودا جودانە و ل رۆژنامەیان ژی بەلاڤبووینە، مە ب فەر دیت ڤێ دیدارێ دگەل بەسنایێ بكەین.
سنێلە/ هەلبەست ل دەڤ تە چییە؟
بەسنە/ هەلبەست ل دەڤ من كارەكی پیرۆزە و جوانە كو مرۆڤ هەلبەستا بنڤیست.
سنێلە/ تە چاوا هەلبەست نڤیسین و كێ پشتەڤانیا تەكر؟
بەسنە/ هزر بوو من هەلبەست نڤیسین و كەسی هاریكاریا من نەكریە و من بخۆ دەست ب نڤیسینا وێ كریە.
سنێلە/ كەنگی تە هەلبەست چێكرینە و هەلبەستێن تە ل سەر چنە؟
بەسنە/ ل ژیێ (13) سالیێ من دەست ب چێكرنا هەلبەستا كریە و تا نهۆ بەردەوامم و هەلبەستێن من ل سەر بابەتێن جودا جودانە، كو من دڤێت ب رێیا هەلبەستێ دەربرینێ ژ بابەتەكی بكەم و هەر هەلبەستەكێ ژی ل دۆر گرنگیا بابەتی دنڤیسم.
سنێلە/ تە چ هیڤی و ئۆمێد هەنە؟
بەسنە/ من دڤێت ل پاشەرۆژێ ببمە هەلبەستڤان و دیوانەكا هەلبەستان چاپ بكەم.
سنێلە/ تە پشكداری د چالاكیان دا كریە و تە هەلبەست ل كیرێ خواندینە؟
بەسنە/ بەلێ من هەلبەست ل قوتابخانەیان و هەلكەفتان گۆتینە.
سنێلە/ ئارەزوویا تە چییە؟
بەسنە/ ئارەزوویا منە ل پەیمانگەها هونەرێن جوان بهێمە وەرگرتن.
سنێلە/ هەلبەست چ جۆرە خۆشیێ ددەتە تە؟
بەسنە/ دەمێ هەلبەستێ چێدكەم ئەز هەست ب خۆشیێ دكەم.
سنێلە/ ل دوماهیێ تە چ پەیڤ هەیە؟
بەسنە/ ئەز سوپاسیا گۆڤارا سنێلە دكەم ژبۆ وێ پشتەڤانیا وان یا بەردەوام بۆ تەخا سنێلان.
پارچەیەكا هەلبەستێ:
دایێ
دایێ دایێ دەیكا منێ
دایێ تە ئەز مەزن كرم
ب شیرێ خۆ ئازاد كرم
دپێچۆلكێدا
خودانكرم
دایێ رۆندكا نە بارینە
ژ بەر زارۆكا…
نەترسینە
دامەزن بت وەك گولا
دا مەزن بت وەك دلا
بەس دایك راستیا رامانا ئەڤینێ دزانیت (بالزاك)
