د سەرسالا كوڤارا سنێلە دا: هەمی هەول و بزاڤ ئەون كوڤارا سنێلە دەست ب وەشانا خو بكەت لێ ب پلان و میكانیزمێن نوی.

د سەرسالا كوڤارا سنێلە دا:
هەمی هەول و بزاڤ ئەون كوڤارا سنێلە دەست ب وەشانا خو بكەت لێ ب پلان و میكانیزمێن نوی.

كوڤارا سنێلە وەكو تاكە كوڤار بناڤێ سنێلە بۆ سنێلان دەر دكەڤیت. شیایە بۆ ماوێ (13) سالان ب گوهرینێن مەزن و ناڤەروكەكا كاریگەر و ب رەنگەكێ رێكخستی (131) ژمارە لێ دەربكەڤن و باشترین خزمەت پێشكەشی جڤاكی بكەت. ب مخابنی ڤە سالا (2014) ێ دەمێ میزانیا حكومەتا هەرێما كوردستانێ ژ لایێ حكومەتا فیدرالا عیراقێ ڤە هاتیە برین و میزانیا كوڤارا سنێلەژی هاتە برین. لێ ب هەولێن بەردەوام تاكو سالا (2019) ژی هەر یا بەردەوام بو. د ڤی ماوەی دا كوڤارا سنێلە شیایە ب سەدان سنێلان ل هزرێن خوكوشتنێ پەشێمان بكەت و ب سەدان سنێلان ب كریارێن خراب و خەلەت ب پارێزیت و ب سەدان سنێلان ژی شیانێن وان نیشا جڤاكی و رایا گشتی بدەت و ب رژدی ل سەر نیشتیمانپەروەری و ژینگەهپارێزی و پەروەردەیی و رەوشەنبیری و هشیاریا سنێلان كار بكەت و ب سەدان چیروكێن سەركەفتی بەلاڤ بكەت. كوڤارا سنێلە شیا بۆ جارا ئێكێ بوردەكێ راوێژكاری ل سنێلان دروست بكەت و وی بوردی (100) ئاریشێن سنێلان دەستنیشانكرن و رێكێن چارەسەریێ دانە دیاركرن. كوڤارا سنێلە شیا بۆ جارا ئێكێ راوێژكاران ل سنێلان دروست بكەت كو ل سەرانسەرێ جیهانێ كارەكێ بڤی رەنگی نەهاتیەكرن. كوڤارا سنێلە شیا بۆ جارا ئێكێ ل باژێرێ دهۆكێ ( دیبەیتا سنێلان ) پێشكەش بكەت كو ببو جهێ سەرنجا رایا گشتی و ب تایبەت ژی سازیێن میدیایی. لێ ب مخابنیەكا ئێكجار مەزنڤە كار بدەستێن ڤێ دەڤەرێ و كومپانیێن ڤێ دەڤەرێ و سەرمایەدارێن ڤێ دەڤەرێ ب تایبەت ژی پارێزگارێ دهۆكێ نەشیاینە خو ل ڤی پرۆژێ مەزنێ ( نیشتیمانی و نەتەوەیی و رەوشەنبیری و رۆژنامەڤانی و پەروەردەیی و هشیاری ) بكەنە خودان كو مە ب نڤیسین ژی دانایە بەر دەستێن وان. پرسیار بكەن ل سەرانسەرێ جیهانێ پرۆژێن بڤی رەنگی پشتەڤانیەكا مادی و مەعنەویا مەزن لێ دهێتەكرن . چونكە سنێلە توێژەكا ئێكجار نازك و هەستیارە.
ئەم دێ هەمی دەرگەهان قوتین و هەمی هەولان دێ دەین بۆ هندێ بشیێن بەردەوامیێ ب وەشانا وێ بدەین .
شازدە سالیا وێ و (13) سالیا دروستا وەشانا وێ ل هەمی خواندەڤانان پیرۆز دكەین و ئەگەر ئەم شیاین پشتەڤانیا دارایی بۆ پەیدا بكەین دێ ب باشترین ناڤەروك و پلان و بەرنامەو چالاكیێن نوی ئێخینە بەر دەستێن خواندەڤانان.
كوڤارا سنێلە ئێك ل پرۆژێن گرنگێن كوردستانێ و پارێزگەها دهۆكێ یە لێ مخابن هێشتا بهاو قەدرێ وێ ناهێتە زانین.
داخوازێ دكەین هەمی لایەك پشتەڤان و هاریكار بن بۆ هندێ بشیێن ئەم هەمی پێكڤە بەردەوامیێ بدەینە ڤی پرۆژێ مەزن و گرنگ.
د گەل رێزگرتنێ

عبدالعزیز محسن بارزانـــی
سەرنڤیسكارێ كوڤارا سنێلە
31-12-2022
باشورێ كوردستانێ- دهۆك