*پرانیا بابەتێن هەلبەستێن من رویدانێن رۆژانە نە
*من دڤێت برێ یا هەلبەستێ خزمەتا وەلاتێ خۆ بكەم
*ل دەمێ ئەز وانێن خو دخوینم ئەز هەلبەستا نانڤیسم
بەرهەڤكرن: ژێگر عبدوالستار
كوڤارا سنێلە هەر جار ل سنێلێن خودان شیان و بەهرە دار دگەریتن و بەهرەیێن وان نمایش دكەتن ژ بوی هندێ كربیتە پالپشت بو باشتر لێ سنێلێن وان. ئەڤ جارە ژیك مە دیدارەك دگەل كچەكا هەلبەستڤان كری یە هژیان ئەیوب دژیێ (16) سالیێ دایە.
سنێلە/بەری تو هەلبەستان ب نڤیسی تە هەلبەست دخواندن؟
هژیان: بەلێ بەردەوام من هەلبەست دخواندن و من حەز ژ هەلبەستان دكر.
سنێلە/ كی پالپشتیا تە دكەت بۆ نڤێسینا هەلبەستان؟
هژیان:برایێ من گەلەك پالپشتیا من دكەتن و ماموستایێن من ژی گەلەك دهاریكارن دگەل من دا.
سنێلە/ بابەتێن هەلبەستێن تە ل سەر چنە؟
هژیان: پرانیا بابەتێن هەلبەستێن من ل سەر بابەتێن نیشتیمان پەروەری و روویدانێن رۆژانە یێت جڤاكی نە؟
هژیان: چونكە من دڤێت ئەز برێیا هەلبەستێ خزمەتا وەلاتێ خۆ بكەم و خەمێن هەر كەسەكی سڤك بكەم.
سنێلە/ تو چاوان دەمێ خو رێك دئێخی بۆ خواندنا خۆ ل قوتابخانێ و نڤێسینا هەلبەستان؟
هژیان: نڤێسینا هەلبەستێ دەمەكێ دیاركری نەڤێت بەلێ ئەز ل دەمێ خواندنێ دا چ جاران هەلبەستان نانڤیسم.
سنێلە/ تو ل چ دەم هەلبەستان دنڤیسی؟
هژیان: ئەز پتریا جاران ب شەڤ هەلبەستان دنڤێسم و دەما ئەز ب تنێ بم.
سنێلە/ توكوڤار و رۆژنامە و پەرتوكێن هەمە رەنگ دخوینی؟
هژیان: بەلێ ئەز گەلەك دخوینم چونكە دڤێت دەمێ مرۆڤ هەلبەستان ب نڤێسیت و زانیاریێن باش هەبیت و گەلەك تشتان ب خوبینیت.
سنێلە/ تو ب چ تورە دبی؟
هژیان: دەما كەسەك درەوێ و خیانەتێ بكەتن ئەز گەلەك تورە دبم.
سنێلە/ كەیفاتە ب چ دهێت ؟
هژیان: دەما ئەز هەلبەستەكێ دنڤێسم و خەلك حەز ژ هەلبەستا من بكەتن گەلەك دلخوش دبم.
سنێلە/ تە هەلبەست كیرێ خواندی نە ؟
هژیان: من ل قوتابخانێ دا گەلەك جاران خواندی نە د سالا (2012 ـ2013) من بەشداری دڤیستەڤالێن چالاكیێن قوتابخانان دا دكر و من ل وێرێ ژی خواندی نە.
سنێلە/ پەیڤاتە یا دوماهیێ؟
هژیان: بلا خێزانێن سنێلان هاریكاربن دگەل و سوپاسی یا كوڤاراسنێلە دكەم كو بەردەوام شیانێن سنێلان بەرچاڤ دكەتن.
پارچەك ژ هەلبەستا هژیانێ
شەڤە
دگەل دیاربونا تاریێ
خەمان سیتافكا خۆ ب سەر من دا ئینا
خەم ناهێلن چاڤێت من بكەڤ نە سەرئێك
دگەل دیار بوونا هەیڤێ هێدی هێدی
هێدی ژ نەخوشیا دلەرزم
گەلەك ژ ڤێ تاریێ دترسیام
ووووترسیام ژبەر نەچوونا دەمی
شەڤ شەڤ گەلەكا درێژ دبیت
میلێن دەمژمێرێن نالڤن
من هزر دكر چ بكەم
من گوت دێ چم خو كەمە مێهڤانا ستێران
لێ ددەمەكی دا ئەوژی نەمان
شەڤ هێشتا ل بەر من درێژ بو
نزانم دناڤ ڤێ تاریێ دا چ بكەم
لێ دیارە قەدەرا من هویە
ب تنێ دشێم بێ دەنگ ببم
و دناڤ خەیالان دا بژیم
چ شەڤەكا نەخوش بو دڤیا دلێ من داگیر بكەت
چارەسەریا بێ چاران بەس هەدارە
