Duhok-DIGC ئنستتیوتا دهوك بۆ ره‌وشه‌نبیریا گشتى
ئه‌رێ راستى قه‌یرانه؟
سه‌رنڤێسكار
د كومبوونه‌كێ دا دگه‌ل ڕێزدار (نێچیرڤان بارزانى) سه‌رۆكێ ئه‌نجومه‌نێ وه‌زیران و ستافێ وى ئه‌گه‌رێن قه‌یرانێ بۆ مه به‌حسكرن:
1. داكه‌فتنا بهایێ نه‌فتێ.
2. شه‌رێ داعشێ.
3. هاتنا ئاواره و په‌نابه‌ران بۆ كوردستانێ.
4. بڕینا میزانییا هه‌رێما كوردستانێ ژ لایێ حكومه‌تا عیراقێ ڤه.
5. نه‌بوونا كارگێرییه‌كا ڕێك و پێك د ناڤ سیسته‌مێ حكومه‌تێ دا.
بۆ هه‌ر ئێكێ ژڤانه ژى هێجه‌ت بۆ ئینان.
ده‌مێ مرۆڤ هزرا خۆ د ڤان لایه‌نان دا دكه‌ت و ب هوورى و ب كوورى ل سه‌ر رادوه‌ستیت ئێكسه‌ر دێ بێژیت ولله راسته ئه‌ڤه ئه‌گه‌رێن سه‌ره‌كى نه بۆ قه‌یرانێ و بارۆدوخێ نۆكه یێ خه‌لكى, لێ ل گۆر باوه‌رییا من ئه‌ڤه بتنێ ئه‌گه‌ر نینه به‌لكو ئه‌گه‌رێن سه‌ره‌كى خه‌لك بخۆنه ئه‌وژى ده‌مێ خه‌لكى چ به‌رنامه و پلان بۆ ژیانا خۆ نه‌بن, دێ رۆژانه تووشى قه‌یرانێن هێشتا مه‌زنتر بن.
-ده‌مێ خێزانێ پلانه‌ك نه‌بیت بۆ به‌خته‌وه‌ریێ ما ئه‌ڤه مه‌زنترین قه‌یران نینه.
-ده‌مێ ده‌یك و بابان چ پلان نه‌بن بۆ شێوازێ ئاراسته‌كرنا زارۆكان ما ئه‌ڤه مه‌زنترین قه‌یران نینه.
-ده‌مێ مامۆستاى چ پلان نه‌بن بۆ هندێ په‌روه‌ردێ به‌رى فێركرنێ نیشا قوتابى بده‌ت ما ئه‌ڤه مه‌زنترین قه‌یران نینه.
-ده‌مێ نوژداره‌ك ب كه‌یفا نه‌خۆشى نه‌فرێ كه‌ته ئه‌و ده‌رمانخانا وى دڤێت و كوم كومه نه‌خۆشان پێگڤه ببه‌ته ژوورڤه ما ئه‌ڤه مه‌زنترین قه‌یران نینه.
-ده‌مێ شوفێره‌ك ل گلوپێ سوور بده‌ت و ڕێزێ ل ترافیكێ نه‌گریت ما ئه‌ڤه مه‌زنترین قه‌یران نینه.
-ده‌مێ خه‌لك بگشتى باراپترى پارێن خۆ ل سه‌یرانێن توركیا و وه‌لاتێن عه‌ره‌بى و ئیرانێ خه‌رج بكه‌ت ما ئه‌ڤه مه‌زنترین قه‌یران نینه.
-ده‌مێ باراپترى خه‌لكى یێ دوو روو ب كه‌رب و كین بیت ما ئه‌ڤه مه‌زنترین قه‌یران نینه.
-ده‌مێ تازى ببنه مه‌لاقى و ب تایبه‌ت د ناڤ ژنكان دا كه‌س دوعا بۆ مرى نه‌كه‌ت و بتنێ مژولى به‌حسێ فلان و فیستانى بن ما ئه‌ڤه مه‌زنترین قه‌یران نینه.
-ده‌مێ جیران ڕێزێ ل جیرانێ خۆ نه‌گریت و به‌لكو به‌رۆڤاژى رۆژانه گلێشێ خۆ ب سه‌ردا به‌رده‌ت ما ئه‌ڤه مه‌زنترین قه‌یران نینه.
-ده‌مێ كوما سنێله و گه‌نجان ل به‌ر دیواران ژمارا ڤه‌شارتییا وایفایێ و ئه‌نترنێتێ ب دزن ما ئه‌ڤه مه‌زنترین قه‌یران نینه.
-ده‌مێ خه‌لك و ملله‌ت ڕێزێ ل سمبولێن نه‌ته‌وه‌یى و پیرۆزیێن وه‌لاتى نه‌گریت ما ئه‌ڤه مه‌زنترین قه‌یران نینه.
-ده‌مێ ئێكى حه‌زژێكرن بۆ وه‌لاتێ خۆ نه‌بیت و بتنێ پێلاڤا وى ب ئاخا وه‌لاتێ وى ڤه گرێدایى بیت ما ئه‌ڤه مه‌زنترین قه‌یران نینه.
ئه‌ڤ بابه‌ته و گه‌له‌كێن دى دڤێت ئه‌م هه‌موو ل سه‌ر ڕاوه‌ستین و مه به‌رسڤا وان پرسیاران هه‌بیت داكو بشێین سه‌ره‌ده‌رییه‌كا گونجاى دگه‌ل هه‌ر ئێك ژ وان بكه‌ین و مه پلان و به‌رنامه هه‌بن داكو زالگه‌هێ ل سه‌ر قه‌یرانان بكه‌ین و نه‌هێلین چ جاران تووشى قه‌یرانان ببین, نۆكه ژى ئه‌م دشێین كونترۆلا خۆ بكه‌ین و حكومه‌تێ ژى نه‌چار بكه‌ین، چونكه حكومه‌ت پشكه‌كه ژ تێگه‌هشتنا خه‌لكى, من دڤیا بابه‌تى ب ئازرینم و هنده‌كێن دى زانستى تر و باشتر ل سه‌ر ڕاوه‌ستن و ڕێكێن دروست نیشا مه بده‌ن.
ئه‌ڤه من هه‌ول دا چه‌ند پرسیاره‌كان بكه‌م و به‌رسڤا وان ژى بده‌م یادى ژى بۆ هه‌وه.
( دگه‌ل رێزگرتنێ )
