چالاگێ»»
نیڤین حەسەن:
ئەز چەند مەزن بم دێ هەر سترانان بۆ زارۆكان بێژم
ئەز دەمێ خۆ رێك دئێخم دا بشێم بخوینم و سترانان ژی بێژم
داخوازێ ژ سنێلان دكەم ل دەمێ سەیرانان سرۆشتی جوان پارێزن
ئەز هەموو وانێن خۆ باش دخوینم و هەموو سالان یا سەركەفتی مە
ئەز گەلەك حەز ژ ئامیرێ كەمانێ دكەم و من دڤێت فێر ببم
دیدار/ ژێگر عەبدولستار
(نیڤین حەسەن) كچەكا سنێلە یا دەنگخۆشە، هێشتا گەلەكا بچووك بوو رێكلام دروست دكرن بۆ باژێرڤانیا دهۆكێ و دژێ نەهـ سالیێ دا بوویە بێژەر ل تێلەفزیوونا دهوك، پاشی چوویە كەنالێ پێلستانك، نوكەژی سترانێن زارۆكان دبێژیت و شیایە، ب دەنگێ جەماوەرەكێ باش دناڤ زارۆك و سنێلان دا بۆ پەیدا بكەت، كۆڤارا سنێلە ب فەر دیت دیدارەكێ دگەل دا بكەت و ئەڤ دان وستاندنە دگەل دا هاتە كرن.
سنێلە/ كێ پشتەڤانیا تەكر كو تۆ سترانان بێژی؟
نیڤین/ من بخۆ گەلەك حەزا سترانگوتنێ هەبوو، پاشی مالا من و مامۆستایێن من پشتەڤانیا من كر و گوتنە من دەنگێ تە یێ خۆشە.
سنێلە/ تۆ چەوان دشێی گونجاندنێ یێ دناڤبەراخواندنا خو و سترانگوتنێ دا بكەی؟
نیڤین/ ئەز دەمێ خۆ رێك دئێخم، دا ئەز بشێم هەر دوو كاران ب باشی ئەنجام دەم، ئەز هەموو وانێن خۆ باش دخوینم و هەموو سالان یا سەركەفتی مە.
سنێلە/ دەمێ كەسەك دەستخۆشیێ ل تە دكەت تۆ چەند دل خۆش دبی؟
نیڤین/ ئەز گەلەك دلخۆش دبم، چونكی هەست پێ دكەم ئەز یا خزمەتێ بو وەلاتێ خۆ دكەم.
سنێلە/ تۆ چ شیرەت ل وان سنێلان دكەی، ئەوێن بەهرەیەك ل دەڤ هەبیت و بەهرەیا خۆ ڤەشێریت؟
نیڤین/ ئەز داخوازێ ژ هەموو سنێلان دكەم، ئەوێن بەهرەدار كو بەهرەیا خو بیننە پێش دا هەر ئێك ژ مە ب رێكەكێ خزمەتا وەلاتێ خۆ بكەین.
سنێلە/ دەمێ تۆ قوناغا سنێلەیێ دەرباز دكەی و مەزن دبی دێ سترانان بۆ كێ بێژی؟
نیڤین/ ئەز چەند مەزن بم دێ هەر سترانان بو زارۆكان بێژم چونكی ئەز گەلەك حەز ژ زارۆكان دكەم.
سنێلە/ تو حەز دكەی پرانیا دەمێ خۆ ل كیرێ ب بۆرینی؟
نیڤین/ ئەز گەلەك حەز ژ باژێرێ خۆ یێ جوان (دهوكێ) دكەم و حەز دكەم هەر ل ناڤ باژێرێ خۆبم.
سنێلە/ تۆ دزانی ئامیرەكێ مۆزیكێ بژەنی؟
نیڤین/ تا نوكە ئەز نزانم، بەلێ ئەز گەلەك حەز ژ ئامیرێ كەمانێ دكەم و من دڤێت خۆ فێربكەم.
سنێلە/ تۆ حەزژ كیژ وەرزی دكەی؟
نیڤین/ ئەز گەلەك حەز ژ وەرزێ بوهارێ دكەم، چونكی سرۆشتێ كوردستانێ گەلەك جوان دبیت و داخوازێ ژ هەموو سنێلان دكەم ل دەمێ دچنە سەیرانان ڤێ سروشتێ جوان پارێزن.
سنێلە/ تو حەز ژ وەرزشێ دكەی؟
نیڤین/ بەلێ، ب تایبەت یاریا باسكتبولێ ئەز گەلەك حەز ژێ دكەم.
سنێلە/ نێزیكترین هەڤال بۆ تە كی یە و چ تشتە؟
نیڤین/ نێزیكترین هەڤال بومن (پەرتوكا من و ئایپادە).
دژیانا خۆدا كەسێ نەئێشینە (جان جاك روسو)
نەڤ بابەتە (78) جارا هاتيە خواندن
