چالاگێ»»
رێڤەبەرا خانیێ چاڤدێریا كچان:
ئەم وەك دەیك و باب سەرەدەریێ دگەل قوتابیێن خۆ دكەین
ئەم ب سەرەدەریەكا جوان ئاریشێن ڤان قوتابیان چارەسەر دكەین
ب خۆشحالیڤە گەلەك كەسێن دەولەمەند هاریكاریا قوتابیێن مە دكەن
ئەم بەردەوام كۆڤارا سنێلە بۆ قوتابیێن خۆ دئینین
بەرهەڤكرن: محەمەد كەریم خان
زارۆك و سنێلە پێدڤی ب چاڤدێریێ نە، د چ كاودان دابن، لەوما ئەو زارۆك و سنێلەیێن بێ سەمیان ژی چاڤدێریا وان دهێتە كرن، ژلایێ رێڤەبەریێن حكومەتا هەرێما كوردستانێ ڤە، خانیێ چاڤدێریا كچان ئێكە ژ وان سازیێن ب ڤی ئەركی رادبیت (140) قوتابی ل دەڤ وان توماركرینە و ژوان (22) دەوامێ دكەن، لەوما مە دیدارەك دگەل خانم (ئینعام محەمەد عەلی ئەحمەد) رێڤەبەریا خانیێ چاڤدێریا كچان كریە.
سنێلە/مەرەم ژخانیێن چاڤدێریا كچان چیە؟
ئینعام: مەرەم ژخانیێن چاڤدێریا كچان ئەوە كۆ ئەم بشێین ئەو زارۆك سنێلێن بێ سەمیان ب چاڤدێریەكا گەلەك باش ب خودان بكەین.
سنێلە/ ئەو سنێلە و زارۆكێن ل دەڤ وە و هوین چاڤدێریا وان دكەن كینە؟
ئینعام: ئەو زارۆك وسنێلێن بێ دەیك و بابن، یان ژی دەیك و باب هەنە نەشێن چاڤدێریەكا تمام ل زارۆكێن خۆ بكەن دئیننە دەڤ مە و ئەم چاڤدێریا وان دكەین، ئەو كچێن ل دەڤ مە دژیێ (7) تا (18) سالیێ و تا ل كولیژەكێ هێتە وەرگرتن، حالەتێن تایبەت یێن هەین، ل ژیێ (4) سالی ژی وەردگرین.
سنێلە/ ئەگەر قوتابییەك ل دەڤ هەوە نەما، هێشتا هوین دووڤچوونا وی قوتابی دكەن؟
ئینعام: بەلێ ئەم بەردەوام سەرەدانا وان دكەین هاریكاریا وان دكەین ل هەموو رۆژێن پێنچ شەمبی و ئەینییان.
سنێلە/ ئاریشێن قوتابیان ل دەڤ هەوە هەنە؟
ئینعام: چ مال بێ ئاریشە نینن، بەلێ ئەم ب سەرەدەریەكا جوان ئاریشێن ڤان قوتابیان چارەسەر دكەین، ئەگەر ئاریشە یا دەروونی بیت، ڤەكولەرێن جڤاكی یێن تایبەت هەنە دگەل ڤان قوتابیان دانوستاندنێ دكەن و ئاریشێن وان چارەسەر دكەن, ئەگەر ئاریشە مەزن بوو ئەم دهنێرین بۆ سەنتەرێ هەڤال و ل وێرێ‌َ چارەسەر دكەن، دیسان ل دەڤ مە هەموو پێدڤیێن قوتابیان هاتینە دابینكرن.
سنێلە/هوین چەند گرنگیێ ددەنە خواندنا ڤان قوتابیان؟
ئینعام: مامۆستایێن تایبەت هەنە ئەركێ رۆژانە د دەنێ, دەوام ب شەڤ و رۆژێ هەیە، ژبەركو ئەڤ كچێن ل دەڤ مە ب شەڤ و رۆژ ل ڤێرێ نە.
سنێلە/ هوین مەزاختیەكی ددەنە قوتابیان؟
ئینعام: بۆ قوناغا سەرەتایی (30) هزار دیناران ددەینێ و (45) هزار بۆ قوناغا ناڤەندی, خوارن و ڤەخوارن و جل و بەرگێن وان ل سەر مەنە, دیسان ب خۆشحالیڤە گەلەك كەسێن دەولەمەند هاریكاریا ڤان قوتابیان دكەن.
سنێلە/ مامۆستا چەوا سەرەدەریێ دگەل قوتابیان دكەن؟
ئینعام: ئەم وەك دەیك باب سەرەدەریێ دگەل دكەین، ئەم وێ باوەریێ ب چێدكەین كو بێژنە مە دادێ, هەر هولەكێ مە مامۆستایەك بۆ دانایە قوتابێن وێ دبێژنێ دادێ.
سنێلە/ هوین روژنامە وكوڤارا بۆ وان قوتابیان دینن؟
ئینعام: بەلێ بەردەوام بۆ دئینین خۆ ب خواندنا وانڤە مژوول دكەن، تایبەت كوڤارا سنێلە كو ل دووڤ ژیێ‌َ وان نە.
سنێلە / ئەرێ هوین بەرپرسن ژ بو پێك ئینانا خێزانێ بۆ وان كچان؟
ئینعام: ئەڤە ڤەدگەریتەڤە بۆ خێزانا وان, ئەم نەشیێن مایتێكرنێ بكەین، د پێكئینانا خیزانێ دا.
ژیان ئاریشە نینە چارەسەر بكەین دیاریە وەردگرین (چارلی چاپلن)
نەڤ بابەتە (62) جارا هاتيە خواندن
