بەهرەمەند نور فەرسەت:
ب رێكا هونەری مرۆڤ دشێت هەستێ خۆ دەربریت
دیدارا كۆڤارا سنێلە دگەل من دا پشتەڤانیەكا مەزنە بۆ من
پشتی هاتیمە پەیمانگەهێ سەرەدەریكرنا من دگەل دەوروبەران هاتیە گوهۆرین
مالا من هەموو پشتەڤانیا من دكەن بو كارێ هونەری
دیدار: ئامینا عەبدولقادر
(نور فەرسەت) قوتابیا پەیمانگەها هونەرێن جوان قوناغا ئێكێ پشكا شێوەكاری یە، ئارەزوویا وێ هونەرێ شێوەكاری یە، كچا باژێرێ دهوكێ یە، وەكی ئەو بخۆ دبێژیت گەلەك حەز ژ وێنەكێشانێ دكەت، كۆڤارا سنێلە ژی كو ب ئەركێ خۆ دبینیت شیانێن سنێلان دهەموو بیاڤان دا بەرچاڤ بكەت، مە بۆ بەرپەرێ هونەری یێ ڤێ هژمارێ ئەڤ دارە دگەل (نور)ێ كریە.
سنێلە: تۆ چ پێناسە ددەیە هونەری؟
نور: ل دەڤ من هونەر هەستە، ب رێكا وی ئەز دشێم هەستێ خۆ دەربرم.
سنێلە: بۆچی تە هونەرێ شێوەكاری هەلبژارت؟
نور: چونكی من گەلەك حەز ژ وێنەكێشانێ دكر، من ڤیا تێكەلا رەنگان بكەم، ژبەر هندێ من حەز كر ل پەیمانگەهێ ژی شێوەكاری بخوینم، داكو باشتر شارەزا ببم ل سەر ڤی هونەری، من ل بەرە یێ بەردەوام بم هندی دژیانێ دا بمینم.
سنێلە: كی پشتەڤانیا تە دكەت؟
نور: كەسێن دەوروبەرێن من و مالا من هەموو پشتەڤانیا من دكەن، ب تایبەتی بابێ من، ئەز گەلەك سۆپاسیا وی دكەم.
سنێلە: تە چ پێشەنگەهێن تایبەت نە ڤەكرینە؟
نور: نەخێر، تا نوكە من نە ڤەكرینە، لێ ئەز یا پێكولێ دكەم، كو من پێشانگەهێن تایبەت هەبن، چونكی دێ شیانێن من باشتر بەرچاڤ بن، ئەڤ دیدارا وە ژی دگەل من دا، پشتەڤانیەكا مەزنە بۆ من.
سنێلە: ژبلی لایێ هونەری هاتنا تە بۆ پەیمانگەهێ چ ل تە زێدە كریە؟
نور: پشتی ئەز هاتیمە پەیمانگەهێ رێكا سەرەدەریكرنا من دگەل دەوروبەران هاتیە گوهۆرین و باشتر لێ هاتیە.
سنێلە: تە چەند موبایل هەنە؟
نور: ب تنێ من ئێك هێلا هەی.
سنێلە: تۆ بەرسڤێن ژمارێن بیانی ددەی؟
نور: بۆ من ناهێن، بەلێ هەكە بهێن ژی ئەز رادكەم و سرۆشتی یە.
سنێلە: تۆ چەند گرنگیێ ب ستایلێ جل و بەرگان ددەی؟
نور: تا رادەكی ئەز گرنگیێ ددەمێ، چونكی وان ژی گرنگیا خۆ یا هەی بۆ مروڤی.
سنێلە: تۆ ب چ تشتەكی نەخۆش دبی؟
نور: درەوكرن ل دەڤ من تشتەكێ گەلەك نەباشە و ئەز پێ دهەرشم.
سنێلە: ب دیتنا تە ژیێ گونجا بۆ پێكئینان هەڤژینیێ كێژكە؟
نور: ئەز دبینم باشترین ژی بۆ شویكرنا كچێ (23) سالی یە و بۆ ژن ئنیانا كوركی ژی (25) سالی.
سنێلە: تۆ گەلەك ئەنتەرنێتی ب كار دئینی؟
نور: ل دویڤ دەمێ خۆ یێ ڤالا ئەز ب كار دئینم و من دوو فیسبووك هەنە، بەلێ هەردوو ب ناڤێ منن.
سنێلە: تشتەك دژیانێ هەیە كو تۆ نەشێی بێی ئەو بژی؟
نور: دەیك و بابێن من و حەزژێكرنا وان بۆ من.
ژ بچووكترین دەرفەت مفای وەرگرە و سۆپاسیا خودێ بكە (براون جاكسون)
