هەلبەستڤانێ سنێلە باوەر شەمسەددین:
حەز دكەم ب رێكا نڤیسینا هەلبەستێ خزمەتەكێ پێشكێشی جڤاكێ خۆ بكەم
پتریا هەلبەستێن من ل دور ئەڤینیێ نە
ئەڤینیێ و حەزژێكرنا وەلاتی كارتێكرن ل سەر من هەبوو كو هەلبەستێ بنڤێسم
ئەز هەلبەستێن ئازاد و سەروادار دنڤێسم
كو هەلبەستێ دنڤێسم پێدڤی یە ئەز یێ ب تنێ بم
دیدار: رەڤەند موسا- دەڤەرا ئامێدیێ
كۆڤارا سنێلە بەردەوام ل دووڤ سنێلێن بەهرەمەند دگەریت داكو شیانێن وان بەرچاڤ بكەت، لەوما شیایە تا نهو هەژمارەكا مەزن ژ سنێلێن خودان شیان دهەموو بیاڤان دا ل سەر بەرپەرێن خۆ مێهڤان بكەت، ئەڤەژی ئێكە ژ ئەركێن مە، بۆ ڤێ جارێ كۆڤارا مە سنێلەكێ هەلبەستڤان كریە مێهڤانێ بەرپەرێ ئەدەبی كۆ ئەو ژی ناڤێ وی (باوەر شەمسەددین)ـە ل دەڤەرا ئامێدیێ، ویژی بەرسڤا پرسیارێن مەدا مە ئەڤ دیدارە هاتە بەرهەڤكرن:
سنێلە: وەك هەلبەستڤانەكێ سنێلە تۆ چ جورێ هەلبەستێ دنڤێسی؟
باوەر: ئەز هەر دوو جورێن هەلبەستێ یا ئازاد و یا سەروادار دنڤێسم.
سنێلە: چ تشتی وەل تەكر كو تو هەلبەستێ بنڤێًسی؟
باوەر: ئەز گەلەك حەز ژ وەلاتێ خۆ دكەم، ئەڤێ چەندێ ژی كارتێكرنەكا مەزن هەبوو ل سەر من كو بشێم هەلبەستێ بنڤێسم، هەر دیسان ئەڤینی و دلداریێ ژی كارتێكرنا خۆ هەبوو تاكو ئەز بوویمە هەلبەستڤان.
سنێلە: كەنگی تۆ هەلبەستێ دنڤێسی؟
باوەر: دەمێ ئەز هەلبەستێ دنڤێسم پێدڤی یە ئەز یێ ب تنێ بم، دیسان ل درەنگی شەڤ كو ئارامی دگەهتە سەر عەردی و هەروەسا ل وەزرێ پایزێ پتر ژ وەرزێن دی دشێم بنڤێسم.
سنێلە: بەهرا پتر هەلبەستێن تە ب چ ڤە دگرێدای نە؟
باوەر: من هەلبەست دبوارێن جودا جودا نڤیسی نە، بەلێ پتریا هەلبەستێن من ل دور ئەڤینیێ نە.
سنێلە: تە دڤێت ب رێكا نڤیسینا هەلبەستێ چ بكەی؟
باوەر: ئەز حەز دكەم كۆ ب رێكا نڤیسینا هەلبەستێ خزمەتەكێ پێشكێشی جڤاكێ خۆ بكەم و ئەڤ بەهرەیا من بۆ خزمەتێ بهێتە بكار ئینان، من دڤێت خزمەتا نەتەوا خۆ بكەم و پێكولێ دكەم هەستێ نەتەوەیی ل دەڤ خەلكێ مە خورت ببیت، چونكی فەرە ل سەر مە ئەم گرنگیێ ب ڤی بیاڤی بدەین و دیسان بشێم خزمەتا هەر دلدارەكی بكەم.
سنێلە: تۆ چەند ژ هەلبەستێن خۆ یێ رازی؟
باوەر: ل دەڤ من یا یا گرنگ ئەوە كا دێ چەوا شێم خەلكی ژ خۆ رازی كەم، چونكی خەلك و خواندەڤان دشێن بەرهەمێن مرۆڤی هەلسەنگینین و مافێ وانە.
پارچەك ژ هەلبەستەكا (باوەر)ی:
دلبەرا من
هەتا كەنگی دلبەرا من
بەرپەرێ من
دێ یێ سپی بیت
هشك بیت حوبرێ خامێ من
پەیڤێن ڤینێ نانڤیسیت
روناك نابیت رێیا من
چەند دێ یا رەش و تاری بیت
ئەو چاندكا ناڤ ملێن من
هەر دێ یا ژ خەما تژی بیت
ئەگەر تۆ مرۆڤان نە رحەت نەكەی، ئەوژی تە نەرحەت ناكەن (و.هازلیت)
