د.بەشیر خەڵاتی رێزلێنانی پێشكەش بە توێژەری كورد عەبدولعەزیز بارزانی كرد

ئەمڕۆ دووشەمە 1/7/2019 د.بەشیر حەداد جێگری سەرۆكی ئەنجوومەنی نوێنەران لەنووسینگەی تایبەتی خۆی لەبەغدا پێشوازی لەنووسەر وتوێژەری كورد عەبدولعەزیز بارزانی كرد . لە دیدارێك دا كە پەرلەمانتاران دیار بەرواری وهەدار بارزانی ومەیادە نەجاڕ ئاماەی بوون، باس لەڕۆڵی رۆشنبیران كرا لە باسكردنی مەینەتیەكانی گەل ودەرخستنی قەبارەی ئەو ناخۆشیانەی كە بەسەریان دا هات.
د.بەشیر دووپاتی كردەوە رۆڵی ئەو نووسەر وتوێژەرەی خەمی میللەتەكەی خۆی بخاتە ئەستۆ، لە رۆڵی هیچ سیاسەتمەدارێك كەمتر نیە، توێژەر خزمەتی گەورە پێشكەش بە میللەت دەكات ودەبێتە پردی گەیاندن لەنێوان میللەتی خۆی وگەلانی دەرەوە وهەوڵەكانی ئەم چینە بۆ ناساندنی گەلەكەیان بە هەموو وردەكاریەكانەوە بەڵگەی رێزگرتنە لەمێژووی خۆی ومافی گەلان لەچوارچێوەی مرۆڤایەتیدا.
لەكۆتایی دیدارەكەش دا د.بەشیر قەڵغانی ئەنجوومەنی نوێنەرانی وەكو خەڵاتی ڕێزلێنان پێشكەش بە نووسەر وتوێژەر د.عەبدولعەزیز بارزانی كرد وەكو رێزێك لەكار وئەركی بەردەوامی بۆ ناساندنی كارەساتی ئەنفالی بارزانی وفەیلیەكان وئەنفالی گەمیان وتاوانی جینۆساید لەدژی گەلی كورد وكیمیابارانكردنی هەڵەبجە وگۆڕە بەكۆمەڵەكان وبەدیكۆمێنتكردنی تاوانە نەگریسەكان لەسەر ئاستی نێودەوڵەتی.
نووسینگەی ڕاگەیاندنی جێگری سەرۆكی ئەنجوومەنی نوێنەران