چالاگێ»»
د.عه‌بدولحه‌مید باڤی:
– ل كوردستانێ دكه‌ڤن دا پێكڤه‌ژیان هه‌بوویه و یاكێم وێنه بوویه
– ئاینێ مه داكوكی ل سه‌ر هندێ كریه گوتنێن سه‌قه‌ت نه بێژینه پیرۆزبێن كه‌سێ
– ژ مه دهێته خواستن گه‌له‌ك گرنگیێ بده‌ینه پێكڤه‌ژیانێ
– یا گرنگه فه‌لسه‌فا لێبۆرین و پێكڤه‌ژیانێ بكه‌ین به‌رنامه ل قوتابخانه و زانكۆیان
به‌رهه‌ڤكرن: كۆڤارا سنێله
د. عه‌بدولحه‌مید عادل یه‌زدین باڤی ژ كه‌سایه‌تیێن به‌رنیاسه ل ده‌ڤه‌رێ، نهو ئه‌ندامێ جڤاتا نوینه‌رێن عیراقێ یه، گه‌له‌ك گرنگیێ ب به‌لاڤكرنا گیانێ لێبورین و پێكڤه ژیانێ دده‌ت، دسه‌ره‌دانه‌كا ویدا بۆ كۆ ڤارا سنێله ئه‌ڤ دیداره دگه‌ل هاته سازكرن.
سنێله/ دیتنا ته بۆ چه‌مكێ پێكڤه‌ژیانێ ب گشتی و ل كوردستانێ ب تایبه‌تی چیه؟
د.عه‌بدولحه‌مید: ل كوردستانێ دكه‌ڤن دا پێكڤه ژیانێ هه‌بوویه و یا كێم وێنه بوویه، گه‌له‌ك یا پێدڤی یه ئه‌م به‌رده‌وام داكوكیێ ل سه‌ر بكه‌ین و بزانین كا چ په‌یام دگه‌هینیت، خودێ مه‌زن د قورئانا پیرۆزدا ئاماژه ب هندێ دده‌ت و دبێژیته مه، مه هوین ژ زه‌لامه‌كی و ژنه‌كێ داینه و پاشی كرینه ملله‌ت ملله‌ت داهوین ئێك بنیاسن و ژیانا خۆ ببه‌نه سه‌ری و باشێ وه ئه‌وه یێ خۆ ب پارێزیت و ژ خودێ بترسیت و باشیێ و قه‌نجیێ بكه‌ت، پێكڤه‌ژیان ئێكه ژ پێدڤیێن ژیانێ، ژمه دهێته خواستن ئه‌م گه‌له‌ك گرنگیێ بده‌ینه پێكڤه‌ژیانێ و ئاینێ مه‌ژی ده‌لیڤێ ناده‌ت ئه‌م جوداهیێ بكه‌ین، یا گرنگه فه‌لسه‌فا لێبۆرین و پێكڤه‌ژیانێ بكه‌ین به‌رنامه ل قوتابخانه و زانكۆیان.
سنێله: به‌لاڤكرنا تێگه‌هێ پێكڤه ژیانێ دناڤ سنێلان دا چه‌ند یا گرنگه؟
د.عه‌بدولحه‌مید: ئه‌ڤ بابه‌ته گه‌له‌ك یێ گرنگه، ژ به‌ركو سنێله ژییه‌كێ هه‌ستیاره، پێدڤی یه خۆل بهێنه ڤه‌كرن به‌رنامێ كاری ل په‌روه‌ردێ پێكڤه‌ژیان بێته به‌لاڤكرن، راگه‌هاندن ژی رۆلێ خۆ ببینت، رێكخراوێن جڤاكێ سڤیل خولان بۆ ڤه‌كه‌ن و داكو نێزیكاتی د ناڤبه‌را واندا چێ ببیت ئه‌گه‌ر ژ دوورڤه سه‌حكه‌نه ئێك دێ وه‌كی كه‌سێن غه‌ریب ئێك بینن، بلا نێزیك بن داكو وه‌سا ببینن تشته‌كێ سروشتی یه، ئه‌م هه‌موو پێكڤه بژین هه‌رئێكی بۆچوونێن خۆ هه‌بن، بلا ئه‌م هه‌ڤسه‌نگیه‌كێ د بابه‌تی دا بكه‌ین، ئانكو ئازادی هه‌بیت و دیسان رێزگرتن ژی هه‌بیت، ئه‌گه‌ر مرۆڤی بڤێت دان و ستاندنێ ل سه‌ر ئاینه‌كی بكه‌ت ژی بلا گوتنێن برینداركرنێ تێدا نه‌بن، ئاینێ مه داكوكی ل سه‌ر هندێ كریه گوتنێن سه‌قه‌ت نه بێژینه پیرۆزبێن كه‌سێ، بلا دان و ستاندنێن مه جوان بن و توندوتیژی ژێ په‌یدا نه‌بیت، ئانكو پێدڤی ب رێزێ ل ژینگه‌ها خۆ بگرین.
سنێله: په‌یاما ته بۆ سنێلان چیه بۆ پێكڤه ژیانێ؟
د. عه‌بدولحه‌مید: داخوازێ دكه‌م گه‌هداریا كه‌سێن ژ خۆ مه‌زنتربكه‌ن و سه‌ر بورێن وان مفای ژێ وه‌ربگرن ئه‌گه‌ر تشته‌ك دگه‌ل هزروبیرێن وان نه‌گونجیت ژی بلا ب رێزگرتنێ ڤه دان و ستاندنێ ل سه‌ر بكه‌ن، هه‌ر به‌ره‌بابه‌كی جوره هزركرنه‌ك یا هه‌ی و جوداهیه‌ك هه‌یه دگه‌ل یێن دی، ئه‌ڤجار یاپێدڤی یه رێزێ ل ئێك بگرن، هه‌ردیسان داخوازێ ژ سنێلان دكه‌م پتر دبیاڤێ ره‌وشه‌نبیریێ دا خۆ ب هێز بێخین، ئه‌ڤرۆ ته‌كنولۆژیا گه‌له‌ك یا پێشكه‌فتی بلا مفای ژ باشیێن وێ وه‌ربگرن و خه‌له‌ت بكارنه‌ئینن و داكو مفای بگه‌هیننه خۆ و وه‌لاتێ خۆ.
سنێله/ دیتنا ته بۆ كۆڤارا سنێله؟
د. عه‌بدولحه‌مید: تشته‌ك باشه كو تشتێن جودا جودا تێدا هه‌نه، دخوازم هشیاركرنا هزرا نه‌ته‌وه‌یێ ل ده‌ڤ سنێلان پتر ب هیز كه‌ڤیت و ب كریار، ژ به‌ركو نوكه ئه‌م پێدڤی هندێ ینه كو ب ئاخا خۆڤه بهێته گرێدان ئه‌م وه‌لاته‌كی بۆ خۆ ئاڤا بكه‌ین، كێماسـیه كو ئه‌م ملله‌ته‌كێ چل ملیون هه‌ر هنده‌ك ژ مه ب زمانێ ملله‌ته‌كێ دی باخڤیت ژ به‌رهندێ پێدڤی یه گرنگیێ بده‌ینه زمانێ كوردی و هه‌روه‌سا جل و به‌رگێ كوردی كو گرنگیا وان ژی وه‌كی یا زمانی یه.
هه‌ول بده ب ده‌ستێن خۆ تشتێن جوان دروست بكه‌ی (براون جاكسۆن)
نەڤ بابەتە (72) جارا هاتيە خواندن
