Duhok-DIGC ئنستتیوتا دهوك بۆ ره‌وشه‌نبیریا گشتى
هونەرێ سەرەدەریێ ل گەل سنێلەی
هندەك جارا مژویلكرنەك دێ ژ دەمژمێران بوریت
خەلەتی ل دەڤ زارۆكانە ئەوێن ژ ئاخفتنێن دایك و بابێن خۆ نەدرازی
دایك و باب ماینە حێبەتی كو نزانن دێ چەوا سەرەدەریێ لگەل سنێلە خۆ كەن
سنێلە د راستگونە دگەل هەڤالێن خۆ پتر ژ دایك و بابێن خۆ
نیهاد سەعدواللە
گەلەك زارۆك یێن هەین دقوناغا سنێلەیێ دا گازندێ دكەن ژبەر وان گڤاشتنێن گەلەك یێن دایك و بابێن وان ل سەر وان دچەسپینن، هەڤالێن وان بۆ وان دهەلبژێرن، ئانكو كانێ گەل كێ 
ب گەرهن و گەل كێ نەگەرهن، هەروەسا سەرەدەریا دگەل وان سنێلان دهێتە كرن نەیا باشە دقوتن و پەیڤێن كرێت و نەشرین دبێژنێ، سەخەكا وان دبەن و ….هتد.
بەرامبەر ڤێ چەندێ گەلەك ژ دایك و بابان و چاڤدێرێن زارۆكان هەنە ئەوێن سەرەدەریێ دگەل زارۆكێن خۆ یان قوتابیان د قوناغا سنێلەیێ دا گازندا دكەن كو زارۆكێن وان دگەل وان د ركو نە، ژ بیرو بوچونێن وان د رازینین، دەمێ دایك و باب یان ماموستا یێن وان تشتەكی دبێژنێ ئەو هوسا هزر دكەن ئەو یێ مایێ خۆ دژیانا وان دكەن، هەروەسا دبینین كو زارۆكێن وان ل مال كچ و كوران دەمێ دگەهنە قوناغا سنێلەیێ ئەو ڤیانا بەرێ دناڤبەرا وان دا نامینیت، گەلەك دمیننە هشیار و نانڤن یان كێم دنڤن، حەز دكەن بتنێ بن، گەلەك ب تەلەفون و ئەنترنێتێ ڤە دمژویلن، دبیت هندەك جارا ئەڤ مژویلكرنا وان ژ دەم ژمێرا دبوریت، كور فێری جگارە كێشانێ دبن و بشەڤ گەلەك دمیننە ل كولانا و گەل هەڤالان، ئەو گەلەك دراستگونە دگەل هەڤالێن خۆ پتر ژ دایك و بابێن خۆ، ئانكو هەموو تشتا بۆ مالێن خۆ نابێژن، بەلێ هەڤالێن وان هەموو تشتێن وان دزانن، ئەرێ خەلەتی دكیرێ دایە؟
-خەلەتی ل دەڤ زارۆكانە ئەوێن ژ ئاخفتنێن دایك و بابێن خۆ نەدرازی؟
-یان خەلەتی ل دەڤ دایك و بابانە ئەوێن ماینە حێبەتی كو نزانن دێ چەوا سەرەدەریێ دگەل زارۆكێن خۆ یێن سنێلە كەن؟
ئەڤ قوناغە قوناغەكا گەلەك گرنگە و دگەل وێ چەندێ یا ب ترسە ژی، ئەو قوناغە یا هەموو مرۆڤ تێرا دبورن دەمێ وەرارێ دكەت وپێش دكەڤیت د ژیانێ دا، قوناغەكا بەروەختە دەست پێ دكەت ل ژیێ (12، 13 ) سالی تاكو (21) سالیێ ژ ژیێ مرۆڤی، پشتی ڤێ قوناغێ ئەڤ سنێلە كچ یان كور هەست ب ئاكنجیبوونەكێ دكەن دژیانا خودا، دێ دەست پێكەت نەخشەیێ ژیانا خۆ دانیت وەكی وی دڤێت، داكو یێ بەرهەڤ بیت بۆ قۆناغا گەهشتنێ.
ڤیان و حەزژێكرن مینا توڤێ گەنمییە پاش چاندنێ وەرارێ دكەت و زێدە دبیت.(پەندەكا ئەفریقییە)
