نعمەت مەحمود:
دئێكەم یاری دا من دوو گول ب سەری توماركرن
* هەموو پێدڤیێن وەرزشی مە ل سەر كیستێ خۆ دكرین
*من تەمەر رەمەزان ژێگرت وەك یاریزانەكێ خۆدان شیان و بهێز
* دەمێ ئەز سنێلە من هەست پێ نەدكر دەست یان پێ من یێ شكەستی
دەمێ بەحسی وەرزشا دهوكێ دهێتەكرن ئَێكسەر وەرزشڤانێ دێرینێ باژێرێ دهوكێ ماموستا (نعمەت مەحمود) دهێتە سەر هزرامە ئەوێ ژیانا خۆ هەموو تەرخانكری بۆ پێش ئێخستن و دروستكرنا بنیاتێ وەرزشا باژێرێ دهوكێ، كو ناڤبری ژ دایك بویێ (13/9/1950)و نێزیكی شەش باوەرنامێن راهینەرێ هەنە و ل گەلەك یانا ئەركێ راهێنەریێ وەرگرتیە. داكو سنێلێ مە مفای ژ سەربورا وی وەرگرن مە ئەڤ دیدارە دگەل سازكر.
دیدار/ دلشاد محەمەد سالح
سنێلە/ كەنگی دەست ب وەرزشێ كریە؟
نعمەت: ل سالێن شێستان وەرزش ل دهوك نەبوو، لێ وەك تیم ل تاخێ مە د ژیێ (11) سالێ دا مە تیمەك دروستكر و مە یاری دگەل تاخێن دی كر و ل وی دەمی پارە گەلەك گرنگیا خۆ هەبوو، مە یاری سەرا پارە و تەپان دكر، بورینا دەمی وەرزش پێشكەفت و من یاری بو قوتابخانێ كر و ئەز هاتمە هەلبژارتن وەك یاریزانەكێ سەركەفتی و دئیكەم یاری دا دوو گول من ب سەری توماركرن.
سنێلە/ دەربارەی دامەزراندنا یانا دهوكێ تۆ چ دبێژی؟
نعمەت: ل سالا (1972) سەروكێ یانا دهوك (نامق دزەیی) بوو، ل وی دەمی ناڤێن مە چەند یاریزانانێن تەپاپێ و باسكت بولێ نڤێسین و مولەتا تیمێ بۆ مە ئینا و مە ل پلا (ریفی) ئانكو بن پلا چوارێ یاری دكرن و سالێن دووڤ دا ئەم هاتینە پلا سیێ و دووێ و ل سالێن نووتان مە ل پلا ئیكێ یاری دكر و ل وی دەمی پلا نایاب نەبوو.
سنێلە/ ل وی دەمی ئاستەنگێن هەوە چ بوون؟
نعمەت: ل وی دەمی هەموو پێدڤیێن وەرزشی مە ل سەر كیستێ خۆ دكرین و نەبوونا گورەپان و گەلەك جاران ژلایێ دادڤانان حیلە و تەعدای ل مە دهاتەكرن حەتا تەپە و پیلاڤێن تەپانێ مە نەبوون.گەلەك جاران ئەگەر شاندەك ژ دەرڤەی دهوكێ هاتبا هەڤالین مە پیلاڤێن وان دكرنە پێ خۆ و دگوت كا چ خۆشی تێدایە و چونكی مە پێلاڤین ئەدیداس و یێن وەرزشی نەدیت بوون.
سنێلە/ چەوان سنێلە دێ یێ سەركەفتی بیت د وەرزشێ دا؟
نعمەت: ژیێ سنێلەیێ هەموو هزر و مێشك و هیزا مرۆڤی كاردكەت بۆ هەر ئارمانجەكا بڤێت، دەمی ئەز سنێلە دەست و پێن من هەردەم دخلیای بوون و ژبەر ڤیانا من بۆ وەرزشی ئەگەر دەستێ من شكەستبا ژی ئەز دا هەر بەردەوامبم و ئەز دبێژمە یاریكەرێن سنێلە هوین قوتابخانێ ژبیرنەكەن و سنێلێن وەرزشڤان هوین پاشەرۆژن و هەردەم هەول بدەن ئاستێ خۆ بلند بكەن و ژێی سنیلە دا دێ دیار بیت كا تۆ چەندێ چەلەنگی د وەرزشێ دا، چونكی وەرزش پەروەردە و هونەرە، هەروەسا دەمێ ئەز راهێنەر ئەز گەریام داكو یاریكەرێن سنێلە و گەنج و چەلەنگ دەست خۆڤە بینم بۆ یانا دهوكێ وی دەمی ئەز چومە زاخۆ و سێمێلێ و من بەرێز (تەمەر رەمەزان) پارێزگەرێ دهوكێ و چەندین یاریكەرێن دی ژێگرتن كو خۆدان شیان و بهێز بوون.
سنێلە/ گرنگیا گیانی وەرزشی ل دەمێ هەوە دا چەوا بو و نوكە چەوا دبینی؟
نعمەت: دەمێ مە وەرزش ئەنجامدا وەرزشڤانێن بیانی دگوت هوین كورد و تایبەت خەلكێ دهوكێ گیانێ وەرزشی یێ هەوە گەلەك یێ بلندە، بەلێ وەرزشڤانێن نوكە نەل وی ئاستێ پێدڤینە.
سنێلە/ بوچی شلوڤەكرنا یاریان ب عەرەبی نە؟
نعمەت: من گەلەك هەولدان كرینە ب زمانێ كوردی بێژم و چەندین ئەو ئاخفتن من برینە دەڤ نڤێسەران كا رامانا وان چی یە ب كوردی، بەلی بینەرێ مە تێناگەهیت و ئەز ب زمانێ جادێ نائاخڤم و گەلەك كەس حەز ژ ڤی زمانی دكەن.
سنێلە/ بۆچی حەز ژ تە پاپێ یا هەلبژارتیێ بەرازیلێ دكەی؟
نعمەت: هەلبژارتیێ بەرازیل و یاریكەر هەموو یاریەكا ئیكگرتی دكەن، دەما گولەكێ دكەن هەموو هەڤبەشن د گولێ دا بێ كو خۆ ب وەستینن و ئەزوكی (ئەنانیەت) دناڤ یاریكەرێن وان دانینە.
نهێنیا سەركەفتنێ، بەری هەر تشتەكی ئامادەبوونە (ه.فورد)
