ئەمیر عەلی:
دەمێ مرۆڤ دچیتە سەر دەپێ شانوویێ مرۆڤ دبیتە مولكێ خەلكی نە یێ خۆ
*شانوو كارەكێ راستە و ئارمانجا وێ یا سەرەكی خزمەتە
*شانوو چارەسەریا بنەرەتیە بۆ كێشە و ئالوزیێن جڤاكی
* بێ رەخنە مرۆڤ نەشێت سنورێن سەركەڤتنێ بەرفرەهتر بكەت
* دڤێت شانووڤان هەردەم دبزاڤا نویكرنێ دا بیت و زانست ببیتە بناغە بۆ ئافراندنێ
دیدار/هاوكار نوری
هونەرێ شانوویێ باشترین رێكا هەڤگرتنێ یە دناڤبەرا خەلكی و دەستهەلاتێ دا، پەیامەكا زۆر هێژایە برێكا وێ پەیامێ ئەوا نەهێتە گوتن و دهێتە دناڤ بابەتی دا, و هەموو چینێت كومەلگەهی مفای بخۆ ژێ وەردگرن,ماموستا (ئەمیر عەلی)شانووڤانەكێ پری چەلەنگ وخودان شیان مێهڤانە بو ڤێ هژمارێ ل كوڤارا سنێلە
.
سنێلە/ بوچی تە شانو هەلبژارت؟
ئەمیر عەلی: چونكە شانوو كارەكێ راستە و ئارمانجا سەرەكیا وێ خزمەتە, من هەر ژ زارۆكینیا خۆ حەز دكر ببمە ئەكتەر و كارێ هونەری بكەم, بەلێ دەمێ مرۆڤ دچیتە سەر دەپێ شانوویێ مرۆڤ دبیتە مولكێ خەلكی نە یێ خۆ.
سنێلە/ شانوویێ چ گرنگیا خۆ هە یە؟
ئەمیر عەلی: شانوو دەرگەهەكێ مەزنە مللەت برێكا وێ دهێتە نیاسین,شانوویێ رولەكێ دیار یێ هەی ژبو وەراربوونا جڤاكان و دیتـنا چارەسەریێن بنەرەت بۆ كێش و ئالوزیێن جڤاكی و رەوشت وتیتالێن نە درۆست, شانوو ئانكو ئازادیا مرۆڤی یە, و هەر ژ كەڤندا بزاڤ كریە خۆ ئازاد بكەت ژ هەموو بنەما و رەوشت كوسپێن ئاینی و سیاسی و جڤاكی , چونكی پەیامەكا مروڤایتی یە وەكی هەموو زانست و ئالێن دی بەلكو بشێت خزمەتا مرۆڤی بكەت.
سنێلە/ كەسانێن شانووڤان دڤێت چ جورە رەوشت ل دەڤ هەبن؟
ئەمیر عەلی: ڤیان, راستگویی, هەستدار, پاكی, هاریكاری، دیسان دیتنا وی نە وەكی هەر كەسەكی بیت بۆ ژیانێ بەلكو ببیتە نموونە بۆ كەسانێن دی.
سنێلە/ سەرەدەریا تە چەوایە دگەل رەخنێ و جارەكێ رەخنە ل تە هاتییە گرتن ؟
ئەمیر عەلی: رەخنە سالوخەتەكا ساخلەمی یە, وب رەخنێ مرۆڤ دێ پێشكەڤیت, و بێ رەخنە باوەرنەكەم مرۆڤ بشێت سنورێن سەركەڤتنێ بەرڤرەه بكەت, بەلێ رەخنەكا زانستی و ئەكادمی بیت, بەلێ رەخنە ل من هاتیە كرن و من گەلەك ب ئاسای وەرگرتی یە.
سنێلە/ بۆچوونا تە شانوو بویە پرەك دناڤبەرا هەژاریێ و دەستهەلاتێ دا؟
ئەمیر عەلی: بەلێ هەر ژكەڤندا پرەك بویە ئەگەر دیروكا شانوویێ بخۆینن,ئەڤ چەندە تێدا یا زالە , چ ئامیرە و ئالاڤ و زانست …هتد)وەك شانوویێ نینن ژ بۆ دروستكرنا كونتاكێ دناڤبەرا خەلكی و دەستهەلاتێ دا یان دناڤبەرا مللەتان دا.
سنێلە/ شانوو ل كوردستانێ ب گشتی و تایبەت ل دهوكێ د چ ئاست دا دبینی؟
ئەمیر عەلی: نە دئاستێ پێدڤی دایە ب گشتی ل كوردستان ودهوكێ, بەلێ ئەڤە وێ چەندێ ناگەهینیت كو ئەز یێ رەش بینم. لێ مە ژمارەیەكا شانووڤانێن باش و چالاك هەنە و براستی جهێ رێزگرتنێ نە.
سنێلە/ دڤێت شانووڤان چ بكەت دا شیانێن خۆ پێش بێخیت؟
ئەمیر عەلی: دڤێت هەردەم دبزاڤا نویكرنێ دا بیت و زانست ببیتە بناغە بۆ ئافراندنێ.
سنێلە/ بەهرا پتر بەشداریێن تە چنە دناڤ شانووگەریان داو حەز ژ چ جورە رۆل دكەی؟
ئەمیر عەلی: بەهرا پتر رولێن سەرەكی من وەرگرتینە، مینا شانوگەریێن من رولێ سەرەكی (هاملت، عتیل، ئەمبراتور، ملیونێرێ ئەڤرۆ، ئەحمەدێ خانی،….هتد). و ئەز حەز ژ رولێن سەرەكی دكەم وەكو (باب، جەنەرال، سەركردە، ….هتد).
ئومێدا نەبیتە راستی وەكو خەونەكا تەحلە
