حەبیب كەلەش:
*ل ژیێ زارۆكینیێ من فرۆكە دیتن دەڤەرا بەرواریا گولەباران دكر و خەلك دكوشتن
*گەلەك جاران مەدیتی یە كو سنێلەیەكێ شڤان دا پەز و مال و كارێ خۆ هێلیت و گەهیتە پێشمەرگەی
* ژبەر كوردستان ئەز بویمە هوزانڤان
* سنێلێن سەركردە دڤێت گیانێ لێبورینێ ل دەڤ هەبیت
پێشمەرگەیێ دێرین (حەبیب كەلەش عەلی) ل سالا (1944) ل باتیفا هاتییە سەر دونیایێ ول ژیێ سنێلەتیا خۆ چوویە دناڤ رێزێن پێشمەرگەی دا، و یێ بەرهەڤە تا دووماهیا ژیێ خۆ خزمەتا وەلاتێ خۆبكەم. بۆ پترنیاسین و بیرهاتنێن وی دگەل ڤێ دیدارێ.
دیدار: ژێگرعەبدولستار
سنێلە/ كەنگی هەستا نەتەوایەتی ل دەڤ تە پەیدابوو، و تە پێشمەرگە نیاسین؟
حەبیب كەلەش: هەر ژ زارۆكینیا خۆ ئەم دچووینە زوزانا، ئەز دگەل كەسەكی چووم و چلی بۆ گیانەوەرێن خۆ دبری هەر داسا خۆ بلند دكر و دگوتە من ئەم دڤێت زیرەك بین ئەم پێشمەرگێن (مەلا مستەفاینە)، دوێ ژیێ بچووك دا من هەر پرسیاركر كا پێشمەرگە كینە و (مەلا مستەفا) كی یە ل وی دەمی من زانی كو ئەم ژیك ملەتەكین و هێش ئەز زارۆك من فرۆكە دیتن ل هنداڤی دەڤەرا بەرواریا گولە د وان گوندا وەردكرن و خەلك دكوشتن ل وی دەمی هەستانەتەوایەتی ل دەڤ من بلند بوو.
سنێلە/ ئەرێ هەستانەتەوایەتی ل دەڤ سنێلێن وی سەردەمی و ڤی سەردەمی تو چەوان دبینی؟
حەبیب كەلەش: گەلەك جاران ئەم دناڤ گوندی دا، دابینین كو سنێلەك د ژیێ (15-16) سالیێ دا شڤان بوو دا بینین دا هێتە ل هنداڤی گوندی دا بێژیت وەرنە پەزێ خۆ ئەڤە ئەز چوومە چیای و گەهشتمە پێشمەرگەی دا مالێ خۆ كارێ خۆ هەر تشتەكی هێلیت و چیت، بەلێ سنێلێن ڤی سەردەمی ژی دباشن بەلێ دڤێت پتر گرنگیێ ب وەلاتێ خۆ بدەن و خزمەتا وەلاتێ خۆ بكەن.
سنێلە/ تە كەنگی هوزان نڤیسی نە؟
حەبیب كەلەش: ئەز قوتابی بوم دەمێ من هوزان نڤێسین كو ب سروشت و جوانیا كوردستانێ پاشان ب پێشمەرگەی و وێ نەخۆشیا ب سەرێ مەدا هاتی یە خوار و تا نوكە (6) پەرتوكێن هوزانا من هەنە و ژبەركوردستان ئەز بویمە هوزانڤان.
سنێلە/ ئەو سنێلێن دڤێن ببنە سەركردە دڤێت چ مەرج ل دەڤ هەبن؟
حەبیب كەلەش: دڤێت خۆ زانا بكەتن و یێ رژدبیت د خواندن و كارێن خۆدا و یێ ب هیڤی بیت و هەول بدەت هەموو دەمان ئەو بەری هەر كەسەكی كارێن باش بكەتن و گیانێ لێبورینێ ل دەڤ هەبیت.
سنێلە/ بۆمە بیرهاتنەكا خۆ یا زارۆكینیێ بێژە؟
حەبیب كەلەش: ل زارۆكینیا خۆ ئەزی بێ دەنگ و رحەت بووم ، بەلێ ل بیرا منە جارەكێ ئەز و هندەك هەڤالێن خۆ چووینە چیای، مە ژنكەكا دان عەمر دیت و من گوتە هەڤالێن خۆ هەرنە سەر دارەكێ دەمێ ئەو پیرەژن هاتی من گوتێ خالەت دارێن مە دئاخڤن گوت چەوا، من تەپەك ل دارێ دا هەموو هەڤالان ل سەر دارێ كرە هەوار ئەو ژنك گەلەك ترسیا، پاشان مە داخوازا لێبورینێ ژێ كر.
نیشانا هەموو سەركەفتنا ئیرادەیە
