عەبدولعەزیز خەیات:
چوار پەرتووك ل سەر فلكلۆری من دروست كرینە
* هەر ژ زارۆكینیا خۆ من گەلەك گرنگی یا دایە سەروسیمایێ خۆ
*جارەكێ مە هندەك هرمیك دزین و دناڤ قالبەكێ بەفرێ دا ڤەشارتن
* ئەز گەلەك حەز ژ كەیفێ و تشتێن جوان دكەم
(عەبدولعەزیز مستەفا) بەرنیاس ب (عەبدولعەزیز خەیات) ل سالا (1954) ل زاخۆ ژ دایكبوویە، هەروەسا هەلبەستڤانەكێ چەلەنگ بویە كو چەندین هەلبەستێن وی بوینە ستران، دیسان خەمخۆرێ كومڤەكرنا فلكلۆری یە، داكو پتر ژیانا وی بزانین مە ئەڤ دیارە دگەلدا سازكریە.
دیدار/ ژێگر عەبدولستار
سنێلە/ بۆچی دبێژنە تە عەبدولعەزیز خەیات؟
عەبدولعەزیز: هێش دژییەكێ گەلەك بچووك دا من كارێ بەرگدروینێ دكر، لەوما ئەز ب ڤی ناڤی بەرنیاس بووم، لێ رژێمی دوكانا من گرت و گوتە من یان دێ هاری مە كەی، یان دێ دوكاناتە گرین، من ژی داخوازیا وان بجه نەئینا.
سنێلە/ بۆچی ب فلكلۆری ڤە هاتیەگرێدان؟
عەبدولعەزیز: چونكی فلكلۆر ناسناما گەلانە و هەر گەلەك ب فلكلۆرێ وی شارستانی و مێژوویا وی دیار دبیت، نەخاسـمە مللەتێ كورد، چونكی مە دكەڤندا نڤێسەر نەبوینە و هەموو مێژوویا مە ب رێكا فلكلۆری، مە كۆم ڤەكرییە و دژیەكێ بچووك دا، ئەز ئەندامێ ئێكەتیا نڤێسەرێن كورد بووم و من و هەڤالێ من (عەبدولعەزیز هاجانی) بریار دا كو ئەم دەست ب كۆمڤەكرنا فلكلۆری بكەین، ل دەستپێكێ مە چەند سەرهاتی كۆمڤەكرن بۆ پەرتووكەكێ، بەلێ هەڤالێ من چوو بەردلۆڤانیا خودێ، من پەرتووكا سەرهاتیا بناڤێ وی و یێ خۆ بەلاڤكر و پشتی سەرهلدانێ من دەست بكارێ راگەهاندنێ كر و بەرنامێن فلكلۆری پێشكێشكرن هەر ژسالا (1992) تاكو نوكە، و پتر ژ (300) دەمژمێرێن سترانان ب دەنگێ سترانبێژان من یێن كۆمڤەكرین و (4) پەرتووك ل سەر فلكلۆری من دروست كرینە.
سنێلە/ ددەمێ سنێلەیا خۆدا تە گرنگی ب چ ددا؟
عەبدولعەزیز: هەر ژ زارۆكینیا خۆ من گەلەك گرنگی یا دایە سەروسیمایێ خۆ و ئەز گەلەك حەز ژ كەیفێ و هەر تشتەكێ جوان دكەم.
سنێلە/ تە كەنگی هەلبەست نڤێسین و چ بابەت بخۆڤە دگرتن؟
عەبدولعەزیز: دژیێ سنێلەیێ دا من هەلبەست دنڤێسین و من دناڤ كۆڤارا و رۆژنامان دا بەلاڤ دكرن و ئێكەم هەلبەستا من بناڤێ (گورزێ گران) بوو، پتریا بابەتێن وان نەتەوایەتی بوون و من دوو پەرتووكێن هەلبەستان بەلاڤكرینە.
سنێلە/ دژیێ سنێلەیێ دا تە حەز ژێكرن كریە؟
عەبدولعەزیز: من حەز ژێكرن دكر، بەلێ حەز ژێكرنەكا پاقژ و یا بێ خەلەتی و من هەڤژینا خۆ یا ئێكێ ژی ب حەز ژێكرن ئینا و پشتی چوویە ل بەر دلۆڤانیا خودێ من دوو هەڤژینێن دی ژی یێن ئیناین و من (9) زارۆك یێن هەین.
سنێلە/ بۆمە بیرهاتنەكا خۆ بێژە ل سەر حەز ژێكرنێ؟
عەبدولعەزیز: من حەز ژ كچەكێ دكر، من ژیك رستكەك بۆ كری ئەز هاتمە مال ئەو رستك مابو دبەریكا مندا خالێ من دبەریكا من دا دیت و نیشا دەیكا مندا، وێ ژی گەلەك شەرێ من كر.
سنێلە/ بیرهاتنەكا خۆش دژیێ سنێلەیێ دا بۆ مە ڤەگێرە؟
عەبدولعەزیز: مە گەلەك جاران كەسێن دین دئارزاندن، جارەكێ ئێكی هات دا من گریت، من خۆ ب جلك ڤە هاڤێتە دناڤ ئاڤێ دا. و جارەكێ ژی من ل بەر كارگەها بەفرێ كاردكر من ژ رەزەكێ نێزیك مە هندەك هرمیك دزین و دناڤ قالبەكێ بەفرێ دا ڤەشارتن، پاشی مە ژبیركر، ئەو قالبێ بەفرێ یێ تژی هرمیك و بۆ ئیكی چوو، و هاتە دەڤ مە و ئاشكرابوو، هەموویا زانی كو مە یێن دزین.
بۆ خوارنێ نەژی، بەلكو بخۆ بۆ ژیانێ (م.ئەمریكی)
