شرین رەمەزان:
ل كەلها نزاركێ زەلام و كورێن من ژمن جوداكرن
پرانیا ژی یێ خۆ من بابێ خۆ نەدیت
خەلكێ سوران گەلەك هاریكاریا مەكر
رۆژەكێ ئەز ژ كاری زڤریمەڤە من دیت زارۆكەكێ من ترۆمبێلێ یا لێدای ژبێ خودانی
دیدار: ژێگر عەبدولستار
شرین رەمەزان سالح خەلكێ گوندێ دەرگەلا شێخایە و ئێك ژ پاشـمایێن ئەنفالانە، كو دناڤ خێزانا وێ دا (4) كەس بوینە قوربانی، و بیرهاتنێن خۆ بۆ سنێلان ب ڤی شێوەی ڤەدگێریتن.
سنێلە/ چەوا تە قوناغێن ژی یێ خۆ دەربازكرینە؟
شرین: ل زارۆكینێ مالا مەل گوندێ دەرگەلاشێخا بۆ و بابێ من پێشمەرگە بۆ، و پرانیا ژی یێ خۆ من بابێ خۆ نەدیت و هێش ئەزا زارۆك بابێ من شەهید بۆ لێ پا دایكا من هەموو دەمان دگووتە مە بابێ هەوە پێشمەرگە بۆ و جانێ خۆ یێ گوری ئاخا وەلاتی كری، و گەلەك جاران دایكا من خوارن بۆ پێشمەرگا دروست دكر و هەر ژ زارۆكینێ دا گەلەك جاران ژبەر فروكێن دوژمنی ئەم درەڤین و دچووینە دشكەفتان ڤە، پاشان دژی یێ سنێلایەتیێ دا من شوویكر و من خێزان پێك ئینا پاشان ئەم چووینە گوندێ زیناڤا و خودێ (8) زارۆك دانە من.
سنێلە/ بومە بەحسێ ئەنفالان بكە كا چەوان ب سەر هەوە دا هات؟
شرین: ئەم ل گوندێ زیناڤا بووین ل دەمژمێر (9) سپێدێ فرۆكە هاتن و جاب گەهشتە مە كو دێ گوندان راكەن ل سالا (1988) و فرۆكان كێمیا هاڤێت و خەلك رەڤی و چوونە دناڤ ئاڤێ دا، داكو چلێ نەهێن و پاشان ئەم رەڤین ژ گوندی دەركەفتین ئەم سێ شەڤ و رۆژان ب پی َ یێن برێ ڤە چووین پاشان رێ ل مەگرت و ئەم ئیناینە ل مانگێشكێ پاشان ئەم كری نە د زیلێن عەسكەری دا و ئەم برنە كەلها نزاركێ و زەلام و كورێن من ژمن جوداكرن و ل پێش چاڤێن من ددانانێ و ئەڤە ژ هینگێ من زەلامێ خۆ و كورێ خۆ دیتی و سەر دەریەكا گەلەك خراب دگەل مە دكر و ئەم برسی و تێهنی هێلاین پاشی ئەم بری نە سەلامیێ و ئەز دگەل زارۆكێن خۆ ماینە ل بەر گەرمێ و زارۆكێن من نساخ بوون ددەستی من دا و خوارن و ڤەخوارن بدەست مە نەكەت پاشێ ئەم بری نە بەحركێ و ئەم هێلاینە ل سەر كەلەكێن بەرا ل وێرێ خەلك د گازییا مە هاتن و خەلكێ سوران گەلەك هاریكاریا مەكر، و زارۆكەكێ من ل وێرێ ژ برسادا جانێ خۆ ژدەست دا، ئەز چووم من كار دكر و من زارۆكێن خۆ دهێلانە بتنێ و ئەز چووم من كاردكر ژ بوی پەیداكرنا نانێ ژیانێ بۆ زارۆكێن خۆ پاشی ئەم هاتینە دهوكێ و بەردەوام من كاردكر رۆژەكێ ئەز ژ كاری زڤریمەڤە من دیت زارۆكەكێ من یێ دی ژی ترۆمبێلێ یا لێدای و ئەوی ژی جانێ خۆ ژدەست دا ژبێ خودانی.
سنێلە/ نەخۆشترین بیرهاتنێن تە ؟
شرین: سێ زارۆكێن من دگەل زەلامێ من جانێ خۆ ژدەست دان بۆ من گەلەكا نەخۆش بۆ، و تایبەت دەمێ من دیت زارۆكێن من ژبرسادا یێن دمرن و نەشێم چ بكەم بۆمن نەخۆشترین بیرهاتنن دژیانا من دا.
سنێلە/ تو چەند ب خۆ شانازی؟
شرین: ئەز گەلەكا ب خۆ شانازم كو من گەلەك نەخۆشی و قوربانی ژ جەرگێ خۆ بۆ ڤێ وەلاتی داینە و تانوكە ژی ئەزا بەرهەڤم ب زارۆكێن خۆ ڤە و ب قوربانی خزمەتا وەلاتێ خۆ بكەم.
سنێلە/ تو چ شیرەتان ل سنێلان دكەی؟
شرین: ئەز داخوازێ ژ وان دكەم هەموو ئێك دل و رەنگ بن و بزانن كو ئازادیا ئەڤرو ب هەروە نەهاتییە و بلا بخوینن و خزمەتا وەلاتێ خۆ بكەن.
مرن ژ برسادا باشترە ل نانێ نەمەردا(سەعدی شێرازی)
