وەرزشڤان نیوار نادر:
*وەرزشڤانێ سنێلە دڤێت بەردەوام راهێنانێ بكەت دا شیانێن وی پتر ب هێزبن
*ئەگەر یاریكەر و هەڤالێن من یاریێ ب شێوەیەكێ پاقژ نەكەن ئەز تۆرە دبم
*یاریكەر بەری بچیتە یاریێ دڤێت خوارنێ وئاڤێ كێم بخۆت و ڤەخۆت
*هەر تیمەكا تەپاپێ داخوازا من بكەت بەرهەڤم ل گەل دا یاریێ بكەم
بەرهەڤكرن:بەختیار قادر
وەرزشڤانێ سنێلە نیوار نادر ژیێ وی شازدە سالن و هەر ژ زارۆكینیا خۆ دا حەزا وەرزشێ هەبوویە و پشكداری دچەندین قارەمانیێن تەپاپێ دا كریە،هەروەسا ئۆمێدا وی ئەوە ل 
پاشەرۆژێ ببیتە یاریكەرەكێ تەپاپێ و خزمەتا وەلاتێ خۆ بكەت،نیوار نادر خەلكێ كۆمەلگەها شاریایە،لەورا كۆڤارا سنێلە ب فەر زانی ڤێ دیارێ ل گەل دابكەت.
سنێلە/ تەچاوا ئارەزۆیا وەرزشێ هەلبژارت؟
نیوار:برایێ من و هەڤالان هاریكاری و پشتەڤانیا من كر ئەز ڤێ ئارەزۆیێ هەلبژێرم، ژبەركو تەپاپێ ژ هەموو یاریێن دی یێن وەرزشی بۆ من خۆشترە.
سنێلە/ تەپاپێ چاوا دبینی؟
نیوار:تەپاپێ گەلەك ل دەڤ من یا خۆش و باشە و بەردەوامم ل سەر كرنا یاریان، دیسان ئۆمێدا منەل پاشەرۆژێ ببمە یاریكەرەكێ تەپاپێ و پێ خزمەتا وەلاتێ خۆ بكەم.
سنێلە/ تەپشكداری دقارەمانیێن وەرزشێ دا كریە؟
نیوار:بەلێ من پشكداری د قارەمانیێن تەپاپێ یێن چالاكیێن قوتابخانان ل سێمێلێ و قارەمانیێن دی ژی ل كۆمەلگەها شاریا داكریە.
سنێلە/ چەند گرنگە دژیێ سنێلەیێ دا سنێلە بخۆ بەهرەكێ و ئارەزۆیەكێ هەلبژێرت؟
نیوار: د قۆناغا سنێلەیێ دا گرنگە هەر سنێلەك بخۆ ئارەزۆیەكا جودا جودا دەست نیشان بكەت،چونكو دێ پتر تێدا پێش كەڤیت.
سنێلە/ ل كۆمەلگەها شاریا وە سنێلێن وەرزشڤان چ ئاریشە هەنە؟
نیوار:ئاریشا مە یا مازن نەبوونا گۆرەپانێن وەرزشی و جلكێن وەرزشی یە،هیڤیدارم ژی ئەڤ هەردوو تشتە بۆ سنێلێن وەرزشڤان بێنە دابینكرن.
سنێلە/ وەرزشڤانێ تەپاپێ دڤێت یێ چاوا بیت؟
نیوار:دڤێت وەرزشڤانێ تەپاپێ یێ ساخلەم و باش بیت و جگارا ژی ب هیچ رەنگەكی نەكێشیت، دا كارتێكرن ل هێزا وی نەبیت و ب شێت یاریێ بكەت.
سنێلە/ شیانێن تەیێن تەپاپێ دچ ئاست دانە؟
نیوار:بۆ یاریكرنێ شیانێن من دباشن و چوو ئاریشە من نینن، دیسان وەرزشڤانێ سنێلە دڤێت بەردەوام راهێنانێ بكەت و ل گەل هەڤالێن خۆ یاریێ بكەت، هەتا ب شێت پتر شیانێن خۆ ب هێز بێخیت.
سنێلە/ د یاریا تەپاپێ دا چی تشت بۆ تە نەیێ خۆشە؟
نیوار:ئەگەر یاریكەر و هەڤالێن من یاریێ ب شێوەیەكێ پاقژ نەكەن، وی دەمی ئەز گەلەك تۆرە دبم، هەروەسا دڤێت یاری یا ساخلەم بیت و دور ژ شەری و توند و تیژیێ.
سنێلە/ بۆ یاریكەرێ تەپاپێ چ وەخت یێ باشە خوارنێ بخۆت؟
نیوار:یاریكەر بەری ب چیتە یاریێ دڤێت خوارنێ و ئاڤێ كێم بخۆت و ڤەخۆت، هەتا ب شێت ب شێوەیەكێ باش یاریێ بكەت، چونكو بۆ غاردانێ نەیا باشە.
سنێلە/ تیمێن تەپاپێ داخوازیا تە كریە؟
نیوار:نەخێر بەز هەر تیمەكا تەپاپێ داخوازا من بكەت بەرهەڤم دگەل دا یاریێ بكەم، هەروەسا ل كۆمەلگەها شاریا ژی من یاری دگەل تیمێن تەپاپێ كریە.
سنێلە/ ل چ قۆناغا خواندنێ دخووینی و بۆچی تە دڤێت ل پەیمانگەها وەرزشی بێ یە وەرگرتن؟
نیوار:نوكە ئەز ل پۆلا هەشتێ دخووینم و حەزا من ژی ئەوە ل داهاتی دا ل پەیمانگەها وەرزشی بێمە وەرگرتن، چونكو دێ پتر زیرەك و شارەزابم ب تەپاپێ.
هەركەسەك بەرپرسێ شكەستنا خۆ یە(صائیبێ تەبرێزی)
