كوردستان وەلاتێ‌ لێبورین و پێكڤە ژیانێ‌

عبدالعزیزمحسن بارزانی

هەلبەتە دگەلەك وەلاتان دا ، هندەك خال هەنە هەردەم جهێ‌ سەرفەرازی و سەربلندیا هەر تاكەكێ‌ نە د ئەوی وەلاتی دا.
وەسا دیارە كوردستان ژی ل وان خالان یا بێ‌ بەهر نینە ، ئانكو ئێك ژ وان خالان كو هەرنەتەوە و ئاینەك ل كوردستانێ‌ پێ‌ سەرفەرازبیت ، یان هێشتا هوورتر هەرتاكەك ل وەلاتێ‌ مە هەردەم وەكو خالەكا گەلەك ب هێز بەرێ‌ خو بدەتێ‌ میناك (لێبورین و پێكڤە ژیان)
ئەڤ خالە نەبتنێ‌ بەحس لێ‌ دهێتەكرن بەلكو هەر پێكهاتەك ب زمانێ‌ خو د خوونت هەر پێكهاتەك ب ئاینێ‌ خو نزایێ‌ بۆ خودێ‌ باوەری بوون ب ئەڤان بیرو باوەران و ب تێگەهێ‌ لێبورین و پێكڤە زوو ب زوو ناهێتە وەرگرتن و قەبولكرن ، لێ‌ خەلكێ‌ كوردستانێ‌ ئەڤ تێگەهە یێن كرینە تێگەهێن پێشیێ‌ ژ بۆی خزمەتكرنا مروڤایەتیێ‌.
خەلكێ‌ وەلاتێ‌ مە ب خوشحالی و سەرفەرازی ڤە باراپتری وەكو مروڤ سەرەدەریێ‌ دگەل هەڤ دوو دكەن ، بەلكو نە وەكو نەتەوە یان وەكو ئاین.
ئەڤەژی خو بخو نیشا ئاستێ‌ هشیاریا تاكێن ئەڤی وەلاتی نیشان ددەت ، كو ئەگەر چەند خالێن ناكوك ژی هەبن ، لێ‌ لێبورین و پێكڤە ژیان خالەكا جێگیرە دمەژیێ‌ مەدا و هەموو ناكوكیان بەرزە دكەت لێ‌ ژ بۆی هندێ‌ ئەڤ تێگەهە هێشتا جێگیر تر ببیت و نەتەوە بۆ نەوەرا دەستێ‌ هەڤ دوو بكەن ب باوەریا من گەلەك یا گرنگە ئەڤ لایەنە ل سەر راوەستن وەكو:
1-خێزان:
ئانكو ل دەمێ‌ پێكڤە كومبوونا خێزانێ‌ ئەڤجا هەر ئاین و نەتە وەیەك بن ، تێگەهێ‌ لێبورین و پێكڤە ژیانێ‌ بۆ زارۆك و سنێلە و گەنجان ب بەردەوامی بهێتە بەحسكرن ، داكو هەموو پێكهاتێن ئەڤی وەلاتی بەری هەرتشتەكێ‌ كوردستان د سەرێ‌ وان دا بیت و ب لێبورین و پێكڤە ژیانێ‌ د سەربلند بن .
2-سیستەمێ‌ پەروەردێ‌:
گەلەك یاگرنگە تێگەهێ‌ لێبورین و پێكڤە ژیانێ‌ وەكو پروگرام بهێتە خواندن و ماموستایێن وانەبێژ بشێن ئەڤی سەقای ژ بۆی قوتابیان دروست بكەن ، داكو ئەڤ تێگەهە بگەهیت و نموونێن زیندی ژی ب بەردەوامی بۆ قوتابیان بەحس بكەن .
چونكە ئەگەر ئەڤە بوو پرۆگرامێن خواندنێ‌ دێ‌ ببیتە پشكەك ل ژیانا زانستی و مەعریفی .
3- مامۆستایێن ئاینی:
خەلك ب گشتی باوەریەكا مەزن ب لایەنێ‌ ئاینی هەیە، ئەجا هەر بیرو باوەرەك بیت ، بلا هەر ئێك درێغیێ‌ نەكەت ل سەر پاراستنا ئاینێ‌ خو گرنگیێ‌ پێ‌ بدەت ، لێ‌ دڤێت ژبیرنەكەین كو ئەم هەموو مروڤین و خوادایێ‌ مەزن ئەم یێن داین ، وە هەر ئێك ژ مە درێكا خودا خودا پەرستیێ‌ دكەت و باوەری پێ‌ هەیە.
لێ‌ مروڤ و مروڤایەتی گەلەك ل هەر خالەكا دی گرنگترن ژ بەر هندێ‌ و ژ بۆی پلان و ئارمانج و رێكخستن و ئاراستەكرنێ‌ ماموستایێن ئاینی ب هەموو ئاینان ڤە رۆلەكێ‌ مەزن هەیە و دشێن ئەڤی تێگەهێ‌ (لێبورین و پێكڤە ژیانێ‌) بكەنە چەكەكێ‌ ب هێز ژ بۆی خزمەتا مروڤی و مروڤایەتیێ‌ . چونكە هەموو دین و ئاین هەر بۆ خزمەتا مروڤایەتیێ‌ هاتینە .
گازی مامۆستایێن ئاینی دكەم ئەگەر هەوە بڤێت هوون دشێن و گەلەك ژی یا ب سانەهی یە كو هێشتا جدیتر ل سەر ئەڤی تێگەهی كار بكەن و جێگیر بكەن ، وە ئەگەر هەوە نەكر ب باوەریا من دوور یان نێزیك دێ‌ نەوەیەك پێگەهیت ل هەوەو ل كەسی كەسی قەبول ناكەن كو لێبورین و پێكڤە ژیان بەری هەرتشتەكێ‌ مەزنترین بیرو باوەر بیت.
4- میدیا:
میدیا ب دیتن ئانكو تێلەفزیون ب بهیستن ئانكو رادیو ب خواندن ئانكو رۆژنامە و كوڤار ب ئەلكترونی ئانكو مالپەر و فەیسبووك و تویتەر و هتد)
د شێن تێگەهێ‌ لێبورین و پێكڤە ژیانێ‌ ژ پلانێن وانێن سەرەكی بیت و كارەكێ‌ هەڤچەرخ ل سەر بكەن ، نەك بتنێ‌ بۆ بریندار كرنا هەڤ دوو خالێن لاوازێن هەڤ دوو ، ئاراستەكرنا هزر و بیرێن بەرتەنگ و ئاراستەكرنا ئایدو لوژیا خو ب فروشنە خەلكی ، وە ئەگەر ل سەر ئەڤێ‌ فروتنێ‌ ژی د بەردەوام بن دڤێت خەلك (متایێ‌) وان نەكریت ، داكو دەمێ‌ ل سەرێ‌ هەیڤێ‌ حساباتێن خو دكەن خوسارەت دەركەڤن و پاشان دوكانا خو قەپات بكەن . بەلكو دڤێت پەروەردە و رەوشەنبیری و گەشەپێدان و رێ‌ نیشاندانا خەلكی بەرەڤ لێبورین و پێكڤە ژیانێ‌ خالا ئێكێ‌ ژ پلانا وان دەست پێ‌ بكەتن ، داكو چ ئەڤروكە و بۆ سوبەهی ژی میدیا و خەلك ببنە دوو بازنێن پێكڤە گرێدایی و باوەری دناڤبەرا وان دا دروست ببیت .
5- رێكخراو كومەلێن مەدەنی:
ل دەڤەرا روژهەلاتا ناڤین كارێ‌ رێكخراوەیی هێشتا ئەزموونەكا نوویە و جێگیرنە بوویە لێ‌ دهێنە نیاسین دەسهەلاتا پێنجێ‌ و گەلەك جاران رۆلێ‌ هەر چوار دەسهەلاتێن دی دبینن و د هەمان دەم دا ل جهێ‌ خو د جێگیرن و ئەڤ رێكخراو كومەلە دشێن رۆلەكێ‌ مەزن بگێرن ژ بۆی تێگەهێ‌ لێبورین و پێكڤەژیانێ‌ و دیسان پێشكەفتی ڤە گوهێزنە كوردستانێ‌ و مفای لێ‌ وەربگرن ، چونكە وان بەری مە دەست ب ئەڤی تێگەهی كرینە و تێدا سەركەفتن ئیناینە و دشێن ئەزموونا وان و خالێن وانێن لاواز و ب هێز دەستنشان بكەن . پشتی هنگی دشێن درێكا چالاكیێن جۆراو جۆرو فشار ئێخستن ل سەر هەر چوار دەسهەلاتێن دی و دەرگەه قوتانا خەلكی ب بەردەوامی دێ‌ رۆژانە ئەڤ تێگەهە ببیتە بیرو باوەركا مەزن د هزر و هەست و رەفتارێن خەلكی ب گشتی دا ل گوور باوەریا من ئەگەر ڤان (5) لایانان كار ل سەر كر و دهەمان دەم دا ژی فیدراسیونەك دناڤبەرا وان دا هەبیت ، داكو كارو خەبات و تێكوشینا وان باشتر و ب لەزتر و ب بەرنامە و پلانتر جێگیر ببیت ، داكو مروڤایەتی ب گشتی مفایەكێ‌ مەزن لێ‌ وەربگرن.
دوی دەمی دا كوردستان ب دروستاهی دێ‌ بیتە وەلاتێ‌ لێبورین و پێكڤە ژیانێ‌ بو دێ‌ تاك هەست ب ئاشتیێ‌ كەن دێ‌ هەست ب لێبوینێ‌ كەن ، دێ‌ هەست ب پێكڤە ژیانێ‌ كەن ، دێ‌ هەست ب هەڤ قەبولكرنێ‌ كەن ، دێ‌ هەست بەختەوەریێ‌ كەن و دێ‌ گەهنە كنارێ‌ تەناهیێ‌ .
كو ئەز باوەرم ئەم هەموو خەونان پێڤە دبینین ، لێ‌ ئەوێن خەون نەبن و خەونێن وان ژی ب جه ناهێن ل داویێ‌ من دڤێت خالەكا گرنگ بەحس بكەم ئەوژی ژ بۆی تێگەهێ‌ لێبورین و پێكڤە ژیانێ‌ چێ‌ نابیت رۆلێ‌ (مەسعود بارزانی) بهێتە ژ بیر كرن ، چونكە كەس نینە هندی جەنابێ‌ وی گرنگیێ‌ ب ئەڤی تێگەهی بدەت.
هەر ئەڤەژی بوو ئەگەرێ‌ هندێ‌ كو خەلاتێ‌ (ئەتلەنتیك) ل ناتو وەربگریت.
بتنێ‌ یامای بێژم (كوردستان وەلاتێ‌ لێبورین و پێكڤە ژیانێ‌).