نێچیرڤان بارزانى ژماره‌كا ژمێریاریێ بۆ كوڤارا سنێله‌ ڤه‌كرى هێلایه‌

من و هه‌ڤالێن خۆ ئاخفتنێن سه‌یر, سه‌یر گوهـ لێ دبن, هه‌ر ئێك ب ره‌نگه‌كى و ب ئاوایه‌كێ ژێكجودا, به‌حسێ كوڤارا سنێله‌ دكه‌ن و دبێژن باشه‌ بۆچى باراپترى ده‌زگه‌هێن ره‌وشه‌نبیرى و ڕاگه‌هاندنێ هاتنه‌ راوه‌ستاندن و گرتن, كوڤارا سنێله‌ هه‌ر یا به‌رده‌وامه‌, هه‌روه‌سا دبێژن مانێ سه‌رنڤێسكارێ كوڤارێ بارزانى یه‌ و (نێچیرڤان بارزانى) ژماره‌كا ژمێریاریێ یا ڤه‌كرى بۆ كوڤارا سنێله‌ هێلایه‌ ڤه‌كرى و چه‌ند پارا رابكێشن هه‌ر دروسته‌, هنده‌ك ئاخفتنێن دى كو چ بنه‌مایێن ئه‌خلاقى تێدا نینه‌ و گه‌له‌ك كرێته‌ ئه‌م به‌حس بكه‌ین.
من دڤێت به‌رسڤا وان هه‌موو گوتگوتكان بده‌م و هنده‌ك راستیان ژى ئاشكه‌را بكه‌م:
1-ب سوپاسیه‌كا ئێكجار مه‌زن ڤه‌ (نێچیرڤان بارزانى)گه‌له‌ك جاران و هه‌تا سالا (2013)ێ ژى هه‌یڤانه‌ (5,000,000) پێنج ملیون دینار وه‌كو به‌خشین و مینا گه‌له‌ك كوڤار و رۆژنامه‌ و رادیو و تێله‌ڤزیون و جهێن ره‌وشه‌نبیرى درێكا حكومه‌تێ دا هاتبوونه‌ ته‌رخان كرن بۆ كوڤارا سنێله‌ كو دبوونه‌ نیڤه‌كا خه‌رجیاتێن كوڤارێ, لێ پشتى هنگى درێكا كه‌رتێ تایبه‌ت و میزانیا پرۆژین (ئنستتیوتا دهۆك بۆ ره‌وشه‌نبیریا گشتى) ب دیزاین و كوالێتیه‌كا ئێكجار بلند و نموونه‌یى مه‌ به‌رده‌وامى دایه‌ كوڤارا سنێله‌ كو پارێ وێ ژ ده‌رڤه‌ى كوردستانێ مه‌ په‌یداكرییه‌.
2-ئه‌ز گه‌له‌ك باش دزانم ل كیڤه‌ دژیم و ل كیڤه‌ كار دكه‌م و تێگه‌هشتنا باراپترى خه‌لكێ ڤێ ده‌ڤه‌رێ چى یه‌, ژبه‌ر هندێ دێ بێژمه‌ وان هوون چ ببێژن و هوون چه‌ند كومبوونان ل سه‌ر من و كوڤارێ بكه‌ن بتنێ ئێك رێك دێ من راوه‌ستینیت, ئه‌وژى (مرن) ڤێجا ئه‌گه‌ر هه‌وه‌ دڤێت من (تیرور) بكه‌ن كه‌ره‌م بكه‌ن خۆ ب جه‌ربینن.
3-ڤیابا بۆ هه‌وه‌ و هه‌موو خه‌لكێ پارێزگه‌ها دهوكێ جهێ سه‌ربلندیێ بایه‌, كو ل هه‌موو عیراقێ و كوردستانێ بتنێ ل پارێزگه‌ها دهوكێ كوڤارا سنێله‌ ده‌ردكه‌ڤیت و ئه‌ز ئه‌گه‌رێ سه‌ره‌كیێ ده‌ركه‌فتنا وێمه‌, من دڤێت بێژمه‌ هه‌وه‌ ئه‌ڤه‌ (10) ده‌هـ ساله‌ وه‌كو خۆبه‌خش ب مال و جهێ كارى و ترۆمبێلا خۆڤه‌ كار ل سه‌ر كوڤارا سنێله‌ دكه‌م, چونكه‌ من باوه‌رى پێ هه‌یه‌, باشه‌ هه‌وه‌ چ كریه‌ و هوون كینه‌ و به‌رهه‌مێ هه‌وه‌ چى یه‌؟ هوون خۆ دنیاسین, ژبه‌رهندێ داخوازێ ل هه‌وه‌ دكه‌م هوون ل سه‌ر گوتگوتكێن بێ بنه‌ما و كه‌رب و كینێ به‌رده‌وام بن, ئه‌ز ژى دێ ل سه‌ر خزمه‌تكرنا كوردستانێ به‌رده‌وام بم, بلا وى ده‌مى خه‌لكێ دلسۆز بریارێ ل سه‌ر به‌رهه‌م و ئه‌نجام و ده‌ستكه‌فتێن مه‌ بده‌ت, كانێ كى دێ چیته‌ د زبلدانا مێژوویێ دا.
هه‌وه‌ پشت راست دكه‌م كوڤارا سنێله‌ رۆژ بۆ رۆژێ دێ ب نووترین بابه‌ت و ناڤه‌رۆك و دیزاین و كوالێتى به‌رده‌وام بیت, چونكه‌ ستافه‌كێ نموونه‌یى و خۆبه‌خش ب رێڤه‌ دبه‌ن, كومه‌كا گه‌نجێن خوون گه‌رم و دلسۆز و خه‌مخور كار تێدا دكه‌ن و دێ ب ئومێده‌كا گه‌له‌ك مه‌زن به‌رده‌وام خزمه‌تا كوردستانێ كه‌ن,هوون ژى دێ به‌رده‌وام كومبوونێن قه‌هر و كه‌رب و كینێ كه‌ن و ئه‌نجامێ هه‌وه‌ بتنێ رووره‌ش و شه‌رمزاری یه‌ و ئه‌نجامێن مه‌ژى سه‌ركه‌فتن و گه‌شبینى و ئافراندنه‌ ل پێناڤى خزمه‌تكرنا كوردستانێ نوكه‌ هه‌وه‌ زانى من چ گۆت.

عبدالعزیز محسن بارزانى