بۆچى سنێله‌ دێ به‌رده‌وام بیت

بۆچى سنێله‌ دێ به‌رده‌وام بیت
سه‌رنڤێسكار
هه‌ر ل ده‌ستپێكێ من دڤێت ئاشكه‌را بكه‌م كو ڕه‌نگه‌ هنده‌ك ئاخفتن د ئه‌ڤێ نڤێسانێ دا دووباره‌ و بگره‌ سێ باره‌ ژى بن, ئه‌وژى ژ به‌ر بیرئینان و گرنگییا روودان و ئاخفتنێ.
كوڤارا سنێلله‌ ب سه‌ر بلندییه‌كا ئێكجار مه‌زن ڤه‌ شیا جودا ل ئه‌وى كه‌لتۆرێ د سالێن بوورى دا ل كوردستانێ و تایبه‌ت ل پارێزگه‌ها دهۆكێ هه‌ى كو چه‌ند ژماره‌یه‌ك ژ كوڤاره‌كێ ده‌ربكه‌ڤن و پاشان راوه‌ستیت, ب هه‌موو باوه‌رى ڤه‌ دێ بێژم به‌رده‌وامییا (10) سالێن كوڤارا سنێله‌ سه‌رئه‌نجام (100) ژماره‌ پێشكێشى رایا گشتى و رۆژنامه‌ڤانییا كوردستانێ و ژ هه‌موویان گرنگتر ته‌خا سنێلان بكه‌ت, كو ئه‌ڤه‌ خۆ بخۆ به‌رسڤه‌كا ئێكجار گرنگ و مه‌زن و پیرۆزه‌ بۆ گه‌له‌ك پرسیاران, ب تایبه‌ت ژى پرسیارێن وان كه‌سێن نزانن پرسیارێ بكه‌ن.
هه‌روه‌سا سنێله‌ د گه‌له‌ك قۆناغێن سه‌خت و دژوار دا ده‌رباز بوو, لێ ب ئیراده‌كا مه‌زن ڤه‌ شیا هه‌موو وان قۆناغان ب سه‌رفه‌رازى ببڕیت.
خاله‌كا دى من دڤێت به‌حس بكه‌م, ل هه‌موو جیهانێ و د ناڤ هه‌ر مال و خێزان و سازى و وه‌لاته‌كى دا كه‌سێ (ئێكێ) رۆڵه‌كێ مه‌زن هه‌یه‌ د سه‌ركه‌فتن و شكه‌ستنێ دا, بۆچى ئه‌ز ڤێ چه‌ندێ دبێژم, چونكه‌ من باوه‌رییه‌كا مه‌زن ب به‌رده‌وامییا كوڤارا سنێله‌ هه‌بوویه‌ و هه‌یه‌ و دێ هه‌بیت ژى, له‌ورا ژ بۆ به‌رده‌وامییا ئه‌ڤێ چه‌ندێ ئه‌ز یێ به‌رهه‌ڤم زێده‌ زێده‌ خۆ ب وه‌ستینم و دگه‌ل گه‌له‌ك لایه‌نان باخڤم و بكه‌ینه‌ هه‌ڤكار و هه‌ڤپشكێن خۆ بتنێ بۆ به‌رده‌وامیێ, هوون دزانن بۆچى؟
چونكه‌ پرۆژێ كوڤارا سنێله‌, ناڤه‌رۆكا كوڤارا سنێله‌, دیزاینا كوڤارا سنێله‌, چاپا كوڤارا سنێله‌, ستافێ كوڤارا سنێله‌, بوردێ راوێژكارى یێ كوڤارا سنێله‌ و ڕه‌نگڤه‌دان و ده‌نگڤه‌دانا گوڤارا سنێله‌ ….هتد, ئه‌ڤه‌ هه‌موو تێرا هندێ دكه‌ن كو ئێكه‌مین پرۆژێ نیشتیمانى, نه‌ته‌وه‌یى, ره‌وشه‌نبیرى, په‌روه‌رده‌یى و گه‌شه‌پێدانا سنێلانه‌ ل هه‌موو عیراقێ و كوردستانێ و ده‌ڤه‌رێ.
ژ به‌ر هندێ ژى ئه‌ڤ خالێن هاتینه‌ گۆتن ئه‌گه‌رێن سه‌ره‌كینه‌ بۆ به‌رده‌وامییا كوڤارا سنێله‌, داكو خاله‌كا گرنگ ب ئاشكه‌رایى ڤه‌ به‌حس بكه‌م ژ وان هه‌موو كاودان و قه‌یرانێن هه‌ین دێ به‌رده‌وامییا كوڤارێ گه‌له‌ك یا ب زه‌حمه‌ت بیت, لێ سۆزێ دده‌م كو گه‌له‌ك رێك و ئالاڤ و میكانزما ب كاربینم بۆ هندێ به‌رده‌وام بیت و من باوه‌رییه‌كا مه‌زن ژى هه‌یه‌ دێ به‌رده‌وام بیت, نه‌خاسمه‌ ستافه‌كێ هێژا و نموونه‌یى كار تێدا دكه‌ن, ئانكو ئه‌م هه‌موو پێگڤه‌ دێ به‌رده‌وامیێ ده‌ینه‌ كوڤارا سنێله‌, ژماره‌ (101) ژى ل هه‌موو لایه‌كى د سالا (2017)ێ دا پیرۆز دكه‌ین, ئه‌ڤه‌ من ب ئاشكه‌رایى به‌رسڤا بۆچى یا ئه‌ڤێ ژمارێ دا.
هه‌تا هژمارا بهێت هه‌ر د سه‌رفه‌راز بن