خه‌یری بوزانی:
• كوردستان جهه‌كێ نموونه‌یی یه بۆ پێكڤه‌ژیانێ
• فه‌ره بابه‌تێن پێكڤه‌ژیان و هه‌ڤدوو قه‌بولكرنێ ل په‌یره‌وێ خواندنێ گرنگی پێ بهێته دان
• پێدڤی یه ده‌مێ مروڤ دبینیت كه‌سێ دی یێ دروسته و حه‌قه مرۆڤ داگێرانێ بۆ بكه‌ت
دیدار: نیوار ئه‌مین
سازیێن حكومی ب تایبه‌تی ئه‌وێن تایبه‌تمه‌ند ب كاروبارێن ئاینی ڤه، رۆله‌كێ گرنگ هه‌یه دبه‌لاڤكرنا ره‌وشه‌نبیریا پێكڤه‌ژیانێ دا، له‌وما كۆڤارا سنێله بۆ ڤێ ژمارێ دیداره‌ك دگه‌ل رێزدار (خه‌یری بوزانی) 
رێڤه‌به‌رێ گشتی كاروبارێن ئێزدیان ل وه‌زاره‌تا ئه‌وقاف و كاروبارێن ئاینی ساز كریه.
سنێله: پێگه‌هێ پێكڤه‌ژیانێ ل كوردستانێ چه‌وایه؟ و به‌ره‌ڤ چ ئاراسته دچیت؟
خه‌یری: كوردستان جهه‌كێ نمونه‌یی یه بۆ پێكڤه‌ژیانێ، به‌راورد دگه‌ل كومه‌لگه‌هێن دی، كو خه‌لكه‌كێ جودا جودا هه‌یه و پێكڤه‌ژیانه‌كا باش هه‌یه، ژبه‌ركو كومه‌لگه‌ها كوردستانێ كومه‌لگه‌هه‌كا فره‌لایه‌نی یا ئولی و نه‌ته‌وه‌یی یه، نه‌وه‌كی چ وه‌لاتێن دی یه، كو ب تنێ ئێك پێكهاتا ئولی یان یا نه‌ته‌وه‌ی هه‌بیت، ژبه‌ر هندێ پێكڤه‌ژیان ل كوردستانێ هه‌بویه و هه‌تا نوكه پارێزگاری ل سه‌ر هاتیه‌كرن و چ ئاریشه‌یێن ئولی چێنه‌بوینه.
سنێله: دێ چه‌وا ئه‌م شێین به‌رده‌وامیێ ل سه‌ر پێكڤه‌ژیانێ كه‌ین ل كوردستانێ؟
خه‌یری: یا ئێكێ حكومه‌ت دام وده‌زگه‌هێن خۆیێن حكومی خۆرت بكه‌ت و هه‌ر دیسان ئالیێ راگه‌هاندنێ بهێز بێخین بۆ هاندانا ئێكرێزیێ و هه‌روه‌سا كه‌سانێن ئاینی ل كومه‌لگه‌هێ پتر رولێ خۆ ببیین، هه‌ر كه‌سه‌كێ بچیته ل سه‌ر مینبه‌رێ ل هه‌ر ئاینه‌كی بیت پێدڤی یه گیانێ پێكڤه‌ژیانێ خۆرت بكه‌ت، هه‌ر دیسان هه‌بوونا بابه‌تێن پێكڤه‌ژیان و هه‌ڤدوو قه‌بولكرنێ ل په‌یره‌وێ خواندنێ گرنگی پێ بهێته دان.
سنێله: هه‌بونا وه‌زاره‌ته‌كا تایبه‌ت ب كاروبارێن ئاینی دناڤ حكومه‌تا هه‌رێما كوردستانێ چه‌ند كاریگه‌ری هه‌بویه ل سه‌ر ئه‌و پێكڤه‌ژیانا نوكه دكومه‌لگه‌ها مه‌دا هه‌ی؟
خه‌یری: ئه‌ز باوه‌رم كو حكومه‌تا هه‌رێما كوردستانێ ئێكه‌م حكومه‌ته ل هه‌موو جیهانا ئیسلامی كو بو جارا ئێكێ یه كو حكومه‌ته‌ك وێره‌كی بده‌ته خۆ ل وه‌زاره‌تا ئه‌وقافێ دا مه‌سیحیان و ئێزدیان یان هه‌رئاینه‌كێ دی پشكدار بكه‌ت، ئه‌ڤه پێنگاڤه‌كا وێره‌ك و باش بوو بۆ به‌ره‌ڤ پێشڤه‌برنا گیانێ پێكڤه‌ژیانێ.
سنێله: گیانێ لێبورینێ و هه‌ڤدوو قبولكرنێ چه‌ند دگرنگن دناڤا كومه‌لگه‌هێ دا؟
خه‌یری: داگێران ل جڤاكێ مه دا تا راده‌یه‌كێ وه‌ك تشته‌كێ كێماتی دهێته هژمارتن بۆ وی كه‌سێ بۆ به‌رامبه‌ری خۆ بكه‌ت، كو گه‌له‌ك ئاریشه‌ك و لێك تێ نه‌گه‌هشتن دناڤبه‌را دوو لایه‌نان دا دروست دبن كو دبیت كه‌سه‌ك داگێرانێ بۆ یێ دی بكه‌ت، لێ ژبه‌ر گوتنێن مرۆڤ و كه‌س و كارێن خۆ نه‌چار دبیت وه نه‌كه‌ت، پێدڤی یه ئه‌گه‌ر مروڤ دبینیت كو كه‌سێ ل به‌رامبه‌ری مروڤی یێ دروسته و حه‌قه وی ده‌می داگێرانێ بۆ بكه‌ت.
سنێله: په‌یڤا ته یا دوماهیێ؟
خه‌یری: نه‌قه‌بولكرنا ئێك و دوو وه‌كی له‌شه‌كێ مروڤه‌كی یه كو میكروب دناڤ دا هه‌بن و ئه‌ڤ میكروبه شه‌ری دژی شانێن دی یێن له‌شی بكه‌ن، و ئه‌ڤی مروڤی هێدی هێدی لاواز بكه‌ن و ئه‌ڤ چه‌نده دێ وه ل وی مروڤی كه‌ت كو دێ بیته مروڤه‌كێ نه به‌رهه‌مدار ژ هه‌ر كاره‌كی بهێته دووركرن.
ژبیر نه‌كه ساخله‌می باشترین نیعمه‌ته (براون جاكسۆن)
